Kryetari i Partisë Mundësia, Agron Shehaj, ka zhvilluar një takim me banorët e njësisë 11 në zonën e “Don Boskos”, ku prezantoi kandidatin për deputet, Anxhelo Allushaj.
Gjatë fjalës së tij, Shehaj e cilësoi Allushajn si një drejtues të suksesshëm në sektorin privat dhe një model të frymës së re që Partia Mundësia përfaqëson në politikë.
“Mos harroni, Anxhelo është një djalë punëtor, një drejtues i rëndësishëm në një kompani shumë të suksesshme. Ka bërë një punë të jashtëzakonshme dhe biznesi ku ai punon është i suksesshëm edhe falë punës së tij”, u shpreh Shehaj.
Ai theksoi gjithashtu se të gjithë kandidatët e Partisë Mundësia janë njerëz që kanë arritur me punë dhe ndershmëri, duke sjellë një model të ri në politikën shqiptare.
“Jo vetëm pjesa më e madhe, por të gjithë kandidatët tanë janë punëtorë, të papërlyer dhe të angazhuar në sipërmarrje apo drejtim biznesesh. Ne besojmë se ata janë zgjidhja e duhur për një politikë ndryshe”, shtoi ai.
Shehaj i ftoi qytetarët që në zgjedhjet e ardhshme të mbështesin Partinë Mundësia dhe kandidatin Anxhelo Allushaj, duke rikujtuar numrin e tyre në fletën e votimit: “Votoni për kandidatët që janë të ndershëm, punëtorë dhe të papërlyer. Partia Mundësia, Anxhelo, numri 10!”.