Nëntitulli:
Operacioni “Epic Fury” përfshin bombardues B-2, sisteme raketore, avionë luftarakë dhe mjete detare në një nga mobilizimet më të mëdha amerikane në Lindjen e Mesme në dekada.
Para sulmeve të përbashkëta SHBA-Izrael kundër Iranit, Uashingtoni kishte dislokuar në Lindjen e Mesme një nga forcat më të mëdha ushtarake të dekadave të fundit, duke përfshirë disa nga armët më të avancuara të arsenali amerikan.
Presidenti Donald Trump kishte paralajmëruar se SHBA ishte “gati për veprim”, ndërsa sulmet e së shtunës, që sipas raportimeve çuan në vrasjen e liderit suprem të Iranit, i dhanë këtij mobilizimi një qëllim të drejtpërdrejtë ushtarak.
Komanda Qendrore e SHBA-së (CENTCOM) publikoi listën e mjeteve dhe armëve të përdorura deri më tani në atë që Pentagoni e quan “Operacioni Epic Fury”.
Bombarduesit “stealth” B-2
Në qendër të operacionit janë bombarduesit strategjikë B-2, të njohur për formën e tyre karakteristike si krahë lakuriqi nate dhe për teknologjinë e padukshmërisë ndaj radarëve. Çdo njësi kushton mbi 1 miliard dollarë dhe konsiderohet ndër platformat më të fuqishme të Forcave Ajrore të SHBA-së.
B-2 mund të mbajnë armë konvencionale ose bërthamore, kanë rreze ndërkontinentale veprimi dhe furnizohen me karburant në ajër. Zakonisht operojnë nga baza Whiteman në Missouri.
Në një mision të vitit të kaluar, shtatë nga 19 bombarduesit e flotës përdorën bomba 30 mijë paundëshe për të goditur objekte bërthamore iraniane. Këtë herë, sipas CENTCOM, janë përdorur bomba 2 mijë paundëshe për të goditur instalime të raketave balistike.
Dronët shpërthyes LUCAS
Operacioni “Epic Fury” shënon përdorimin e parë luftarak të dronëve LUCAS nga SHBA.
Sipas CENTCOM, njësia Task Force Scorpion Strike u aktivizua në Lindjen e Mesme në fund të vitit të kaluar. Sistemi LUCAS (Low-cost Unmanned Combat Attack System) konsiderohet një version i ngjashëm me dronët iranianë Shahed 136, të përdorur gjerësisht nga Rusia në Ukrainë.
Zyrtarët amerikanë theksojnë se këta dronë me kosto të ulët janë krijuar për të ofruar kapacitete të shpejta dhe efektive në fushëbetejë.
Aeroplanmbajtëse dhe anije luftarake
Dy aeroplanmbajtëse amerikane – USS Abraham Lincoln dhe USS Gerald R. Ford – ndodheshin në rajon në momentin e nisjes së sulmeve. Lincoln ishte në Detin Arabik, ndërsa Ford në Mesdhe, pranë Izraelit.
Anijet kanë lëshuar avionë F/A-18 dhe F-35, ndërsa shkatërrues me raketa të drejtuara kanë qëlluar raketa Tomahawk drejt objektivave iraniane.
Shkatërruesit e klasës Arleigh Burke mund të mbajnë deri në 96 raketa Tomahawk dhe janë të pajisur me sistemin mbrojtës Aegis për t’u përballur me kërcënime balistike.
Sistemet Patriot dhe THAAD
Bateritë Patriot dhe THAAD (Terminal High-Altitude Area Defense) janë përdorur për të neutralizuar dronë dhe raketa balistike iraniane.
Megjithatë, numri i interceptorëve të përdorur mbetet i panjohur. Analistët kanë ngritur shqetësime për rezervat, për shkak të përdorimit intensiv në konfliktet e fundit dhe furnizimeve për Ukrainën.
Avionë luftarakë dhe mjete speciale
Në operacion janë përfshirë:
- F-16 dhe F/A-18
- F-22 dhe F-35 (avionë “stealth”)
- A-10 për sulme tokësore
- EA-18G Growler për luftë elektronike
- AWACS për paralajmërim të hershëm dhe kontroll ajror
- MQ-9 Reaper për sulme me raketa Hellfire
- Sistemet raketore HIMARS me rreze mbi 300 milje
Gjithashtu, avionë cisternë KC-135 dhe KC-46 kanë kryer furnizim në ajër, ndërsa avionë transporti C-17 dhe C-130 kanë dërguar trupa dhe municione në rajon.
Përmasat dhe lloji i mjeteve të përdorura tregojnë për një operacion të nivelit të lartë teknologjik dhe një angazhim të gjerë ushtarak amerikan në rajon.
Ndërsa Irani ka reaguar me sulme hakmarrëse me dronë dhe raketa, tensionet në Lindjen e Mesme vijojnë të mbeten në nivele kritike, me rrezik për përshkallëzim të mëtejshëm të konfliktit.