Shtetet e Bashkuara kanë ndaluar zyrtarët palestinezë të marrin pjesë në Asamblenë e Përgjithshme të Kombeve të Bashkuara (UNGA) muajin e ardhshëm në New York, një veprim që vjen ndërsa disa vende perëndimore po përgatiten të njohin shtetin palestinez.
“Sipas ligjit amerikan, Sekretari i Shtetit Marco Rubio po refuzon dhe po revokon vizat për anëtarët e Organizatës për Çlirimin e Palestinës (PLO) dhe Autoritetit Palestinez (AP) para Asamblesë së Përgjithshme të Kombeve të Bashkuara që po afrohet”, tha Departamenti i Shtetit në një deklaratë.
Raportohet se Departamenti i Shtetit edhe më 31 korrik vendosi sanksione ndaj PLO-së dhe AP-së, duke ua mohuar vizat anëtarëve të tyre për në SHBA.
Në deklaratën e tij, Departamenti i Shtetit i SHBA-së tha se misioni i Autoritetit Palestinez në OKB nuk do të përfshihej në kufizime.
Ky veprim vjen ndërsa Franca, Britania, Kanadaja dhe Australia kanë shpallur planet për të njohur një shtet palestinez në Asamblenë e Përgjitshme të ardhshme të OKB-së, duke iu bashkuar mbi 140 vendeve që tashmë e kanë bërë këtë.