Prokuroria e Posaçme Kundër Korrupsionit dhe Krimit të Organizuar ka publikuar raportin mbi punën e bërë në vitin 2024 teksa evidenton edhe problemet për të cilat thonë se duhen adresuar. Në raport, SPAK e vë theksin te presionet nga politika dhe krimi, që cënojnë pavarësinë kushtetuese të këtij institucioni dhe efektivitetin në hetime.
Në raportin e dërguar Kuvendit, SPAK thotë se për të garantuar pavarësinë dhe mbështetje për prokurorët në çështje te ndjeshme nevojitet një reagim më i koordinuar dhe në kohë i të gjitha institucioneve, të cilat kanë përgjegjësinë e mbrojtjes së integritetit të Prokurorisë së Posaçme.
“Presioni i jashtëm nga krimi i organizuar, aktorë politikë dhe mediatik, i cili cenon pavarësinë e tij kushtetuese dhe efektivitetin në hetime. Ndërhyrjet e jashtme rrezikojnë gjithashtu, integritetin e prokurorëve dhe të procesit hetimor. Për të garantuar pavarësinë e SPAK-ut, si dhe mbështetje për prokurorët në çështje të ndjeshme, nevojitet një reagim më i koordinuar dhe në kohë i të gjitha institucioneve, të cilat kanë përgjegjësinë e mbrojtjes së integritetit të SPAK.”
SPAK në raportin e vitit 2024 vlerëson pozitivisht luftën kundër krimit të organizuar në krahasim me 2023-in. Po ashtu është rritur numri i personave të cilët janë nën hetim.
“Lufta kundër krimit të organizuar edhe për këtë vit, krahasuar me vitin paraardhës, ka shënuar arritje të rëndësishme me një rritje prej rreth 18,8% të regjistrimeve të këtyre procedimeve penale. Po kështu, është rritur edhe numri i personave të cilët janë nën hetim për këto procedime me rreth 21,6%, krahasuar me vitin 2023. Nga ana tjetër, ka një rënie me rreth 7,3% të çështjeve të dërguara për gjykim për shkak të volumit dhe kompleksitetit të tyre”– thuhet në raport.
Gjatë vitit 2024, rezultojnë 33 zyrtarë të lartë nën hetim, thotë SPAK (ku dy prej tyre janë të regjistruar në dy procedime të ndryshme secili), nga të cilët 19 zyrtarë janë dërguar në gjykatë me kërkesë për gjykim. Kjo e dhëne tregon një nivel të lartë të përfundimit të hetimeve, me ngritje akuzash konkrete për këtë nivel të sofistikuar korrupsioni.
Po ashtu në raport theksohet se referimet e ardhura nga Policia e Shtetit gjatë 2024-ës kanë shënuar rënie shqetësuese.
“Bashkëpunimi nga institucionet publike në lidhje me referimet e ardhura prej tyre ka nevojë ende të përmirësohet. Kështu numri i procedimeve të filluara nga referimet e përcjella nga institucionet publike mbetet i ulët, duke zënë vetëm 15,1% të totalit të referimeve të dërguara pranë SPAK nga të gjitha subjektet publike dhe private. Është për t’u theksuar se, referimet e ardhura nga policia e shtetit, krahasuar me vitin 2023, kanë shënuar gjithashtu një rënie shqetësuese me 53,8%”- thuhet në raport.