Në zgjedhjet parlamentare të 11 majit beteja për të hyrë në Kuvend nuk bëhet vetëm mes kundërshtarëve politikë, por edhe brenda partisë.
Kandidatët, të cilët janë në listë të hapur e ndjejnë më shumë presionin e garës pasi një votë më tepër të çon në Kuvendin e Shqipërisë. Por, kjo garë e ethshme ka krijuar shqetësimet e para.
Pikërisht gara brenda llojit ka sikletosur kryetarin e Partisë Socialiste, Edi Ramën. Mediat raportojnë se Rama u ka treguar kufijtë kandidateve të tij pasi ka ndjerë se lufta në terren mes kandidatëve të listës së hapur është reflektuar edhe brenda strukturave të partisë.
Për ta frenuar konfrontimin e ashpër mes socialistësh, Rama ka urdhëruar që asnjë kandidat, qoftë edhe deputet aktual, nuk duhet të përdorë strukturat e PS të një zonë tjetër për të mbledhur vota në favorin personal.
“Asnjë deputet s’duhet të hapë zyra te veta jashtë zonës së caktuar nga drejtuesi politik. Deputeti është i lirë të bëjë takime ku të dojë, por në asnjë mënyrë nuk duhet të përdorë për takimet e tij strukturën. Struktura është në funksion të qëllimit të përbashkët, jo për t’u bërë tabelë qitje e çdo deputeti”, ka porositur Rama.
Rama po ashtu u ka treguar “vijën e kuqe” kandidatëve, që janë në lista të mbyllura.
Sipas tij, ata duhet të kërkojnë vota vetëm për numrin 5 dhe jo për kolegët e tyre kandidatë, që ndodhen në betejë të hapur.
“Deputetët në listë të mbyllur nuk duhet kategorikisht të kërkojnë vota për asnjë deputet në listën e hapur, po vetëm për numrin 5. Të gjithëve duhet t‘u thonë tek vota preferenciale jeni të lirë! Po ashtu deputetët në listën e hapur nuk është mirë t’u kërkojnë kolegëve në listën e mbyllur vota në zonën përkatëse, pasi e para i vënë në pozitë të vështirë, e dyta i shtyjnë drejt prishjes së barazisë së garës dhe e treta i bëjnë të çorodisin strukturën”, theksoi kryesocialisti.
Me këtë logjikë dhe porosi të Ramës, i bie që një kandidat i Partisë Socialiste që është caktuar në njësinë 4 nuk mund të kërkojë ndihmën e strukturave të partisë për të mbështetur një emër tjetër në zonën 5.