Qeveritë evropiane kanë publikuar udhëzime për sigurinë dhe numra emergjence për udhëtarët, ndërsa përmbytjet dhe rrëshqitjet e dheut kanë ndërprerë transportin në disa zona të Nepalit.
Qindra turistë të huaj rezultojnë të zhdukur pas përmbytjeve shkatërruese që goditën një zonë të Nepalit të frekuentuar nga udhëtarë ndërkombëtarë.
Bordi i Turizmit i Nepalit bëri të ditur të enjten se 644 turistë kanë humbur kontaktin, mes tyre 517 shtetas të huaj. Ata janë nga 19 vende evropiane, si dhe nga Kina, Shtetet e Bashkuara dhe Australia.
Autoritetet u kanë bërë thirrje udhëtarëve të njoftojnë policinë ose autoritetin më të afërt të sigurisë, administratën lokale, agjencinë e udhëtimit, guidën apo operatorin turistik për vendndodhjen e tyre.
Në një deklaratë, Bordi i Turizmit u kërkoi turistëve: “Qëndroni të qetë, të informuar dhe ndiqni udhëzimet zyrtare të sigurisë.”
Fatkeqësia ka prekur veçanërisht distriktin Rasuwa dhe zonën fqinje të Nuwakotit, në veri të Katmandusë dhe pranë kufirit të Nepalit me Tibetin.
Nepali është prej kohësh një nga destinacionet më të njohura të Azisë për turistët me buxhet të kufizuar, alpinistët dhe udhëtarët në kërkim të aventurës. Ata tërhiqen nga peizazhet spektakolare të Himalajeve, kostot relativisht të ulëta të udhëtimit, si dhe kombinimi i trekkingut malor, qyteteve historike dhe kulturës budiste e hindu.
Në Nepal ndodhen tetë nga dhjetë malet më të larta në botë, përfshirë malin Everest. Sipas të dhënave zyrtare, në vitin 2025 vendin e vizituan 1.16 milionë turistë ndërkombëtarë, mes tyre më shumë se 165 mijë persona që morën pjesë në aktivitete trekkingu.
Çfarë duhet të bëjnë udhëtarët në Nepal?
Qeveritë evropiane dhe ambasadat e vendeve të tjera u kanë bërë thirrje udhëtarëve të ndjekin udhëzimet e autoriteteve nepaleze dhe të monitorojnë nga afër situatën në zonat ku ndodhen.
Ambasadat e Finlandës, Francës dhe Mbretërisë së Bashkuar, së bashku me përfaqësuesit e Australisë, Norvegjisë dhe Zvicrës, si dhe Delegacioni i BE-së në Nepal, publikuan një deklaratë të përbashkët ku u kërkohet qytetarëve të “ndjekin udhëzimet e autoriteteve lokale dhe njoftimet zyrtare të sigurisë, ndërsa situata vijon të ndryshojë.”
Franca paralajmëron se për shkak të përmbytjeve dhe rrëshqitjeve të dheut, rrjetet telefonike dhe lidhjet e internetit mund të ndërpriten për disa ditë. Udhëtarëve u këshillohet të kontaktojnë autoritetet lokale përpara se të nisin udhëtimet dhe të ndjekin udhëzimet e tyre.
Holanda këshillon personat e prekur nga përmbytjet të zhvendosen në zona më të larta, të shmangin urat dhe të mos tentojnë të ecin apo të notojnë nëpër ujërat e përmbytjeve. Udhëtarët duhet të jenë të përgatitur për evakuim dhe të mbajnë pasaportat, ilaçet dhe sendet e tjera të domosdoshme në një çantë që nuk lejon depërtimin e ujit.
Udhëtarët e huaj duhet gjithashtu:
Të shmangin zonat e prekura nga përmbytjet dhe rrëshqitjet e dheut dhe të mos udhëtojnë drejt tyre vetëm për të parë dëmet.
Të qëndrojnë larg lumenjve, brigjeve të tyre, urave, shpateve të paqëndrueshme dhe ndërtesave të dëmtuara.
Të kontrollojnë parashikimet lokale të motit, paralajmërimet për përmbytje dhe gjendjen e rrugëve përpara se të udhëtojnë.
Të kontaktojnë operatorin turistik, kompaninë e trekkingut, guidën ose strukturën ku janë akomoduar përpara se të tentojnë të ndryshojnë vendndodhjen.
Të mbajnë të informuar familjarët apo miqtë për vendndodhjen dhe gjendjen e tyre, mundësisht përmes mesazheve apo internetit në rast se rrjetet telefonike janë të mbingarkuara.
Të mbajnë telefonat të karikuar dhe pasaportat, ilaçet dhe dokumentet e rëndësishme në një vend lehtësisht të aksesueshëm.
Të kontaktojnë kompaninë e sigurimit të udhëtimit sa më shpejt të jetë e mundur nëse udhëtimi është ndërprerë ose nëse kanë nevojë për trajtim mjekësor, evakuim apo riatdhesim.