Gjermania pritet t’i dërgojë edhe 150 trupa shtesë te misioni i NATO-s në Kosovë, KFOR-i, ka bërë të ditur kryediplomatja gjermane, Annalena Baerbock.
Këtë ajo e bëri të ditur pas takimit të Ministrave të Jashtëm të NATO-s, duke theksuar se në Ballkan paqja mbetet e brishtë.
“Paqja shpesh varet nga një fije në Ballkanin Perëndimor. Angazhimet e NATO-s dhe të BE-së janë të koordinuara. Kemi EUFOR-in, misioni që siguron stabilitetin në Bosnjë dhe Hercegovinë dhe KFOR-in në Kosovë. Gjermania do të kontribuojë deri në 150 trupa shtesë për KFOR-in”, thuhet në njoftim.
Diskutimet në nivel të ministrave të NATO-s rreth situatës në rajon ajo i cilësoi si tejet të rëndësishme. Sipas ministres Annalena Baerbock, perspektiva e anëtarësimit të vendeve të rajonit në BE është e rëndësishme sepse ky paraqet “sigurim jetësor”.