Ditën e djeshme, Prokuroria e Posaçme vendosi mosfillimin e procedimit penal, për kallëzimin e paraqitur nga Olsi Rama për Gazment Bardhin, për akuzat që ky i fundit bëri ndaj vëllait të kryeministrit për përfshirjen në grupin e trafikantëve të laboratorit të Xibrakës.
Padia është rrëzuar me argumentin se Gazmend Bardhi ka bërë vetëm deklaratë televizive, dhe jo kallëzim në SPAK.
Menjëherë pas këtij njoftimi të SPAK, erdhi edhe reagimi i kryeministrit Rama, i cili tha se kallëzimi i është shitur si sapun për djathë emisionit investigativ italian, duke ju referuar reportazhit të RAI 3. Po ashtu Rama ka sulmuar Bardhin, që sipas tij “është thjesht çingije që ngre dorën duke kërcyer prehër më prehër sikur ka gur për të hedhur”.
Por si qëndron e vërteta e kallëzimit të Gazment Bardhit?
Gazment Bardhi nuk ka bërë asnjë kallëzim për Olsi Ramën, por i ka dërguar Prokurorisë së Posaçme informacion për fillimin e hetimeve penale ndaj Olsi Ramës, pasi ky i fundit e ka pasur një procedim penal për këtë çështje, por është mbyllur për mungesë provash.
Pra, Gazment Bardhi ka këkruar rihapjen e asaj çështje, duke mos bërë kallëzim të ri. Vetë kreu i grupit parlamentar të PD-së, ka publikuar dokumentin me të cilin i është drejtuar SPAK, teksa thotë se dosja penale ekziston e pezulluar dhe informacioni/kallëzimi shtesë është për ta vënë në lëvizje këtë dosje që Edi Rama do të dëshironte ta varroste.
Njoftimi i SPAK nxorri blof kryeministrin Rama, teksa tashmë është në dorën e SPAK nëse çështja e Olsi Ramës do të rihapet, apo do të mbyllt përfundimisht.
Reagimi i plotë i Gazment Bardhit:
Nëse Edi Rama do të kuptonte nga ligji, Shqipëria do të ishte një vend më i mirë, dhe nuk do të ishte në krye të listës së vendeve me korrupsion madhor të përhapur në çdo sektor apo me lidhje të forta me krimin e organizuar.
Avokati i çdo afere korruptive dhe kriminale të familjarëve dhe bashkëpunëtorëve të tij, do të donte që numri 335/1 të mos ekzistonte në databazën e prokurorisë, që kjo e fundit të regjistronte një kallëzim të ri, që raportet e policisë dhe përgjimet e prokurorisë shqiptare dhe gjermane të dosjes Xibraka të mos ekzistonin, që të dhënat e TIMS të mos ekzistonin. Fati i keq i vëllait të madh të Olsit, është që ato ekzistojnë dhe janë në dosjen 335/1. Asnjë propagandë e jotja, veglave të tua, apo mediave në shërbimin tënd, nuk e fshehin dot të vërtetën, as makinën me targë AA 653 DM. As budallëku yt se unë paskam kapur Rai 3, nuk e zhvendos dot vëmendjen nga e vërteta, sado të qeshura shkakton!
Për zhurmën e ditës, do ta kuptojë shumë shpejt Edi Rama, nëse kam bërë apo jo kallëzim në SPAK për vëllain e tij që ka përdorur të njëjtën makinë me kartelin e drogës. Dallimin ligjor të informacionit/kallëzimit që kam dërguar në Prokurorinë e Posaçme Antikorrupsion me kallëzimin e ri që regjistrohet në regjistrin e veprave penale në kuptimin penal të fjalës, mund t’ia shpjegojë fare mirë Engjëll Agaçi, eksperti i tij për çështjet e trafikantëve të drogës. Megjithatë një shpjegim mund t’ia jap dhe unë.
Çështja e hetimit të përfshirjes së Olsi Ramës në trafikun e Xibrakës është njësoj si çështja e hetimit të përfshirjes së Edi Ramës në aferën e korruptimit të ish-shefit të kundërzbulimit të FBI-së Charles McGonigal. Për McGonigal kërkova të nisë hetimi. Kur dolën fakte të reja, nuk dorëzova kallëzim nga e para, por dërgova informacion shtesë të kallëzimit, sepse dosja penale ekziston. Njësoj dhe për Olsin e çunave të Xibrakës. Dosja penale ekziston e pezulluar dhe informacioni/kallëzimi shtesë është për ta vënë në lëvizje këtë dosje që Edi Rama do të dëshironte ta varroste.
Tani, do të merremi me fjalorin juridik apo me faktin që të dy vëllezërit Rama janë nën hetim nga SPAK, njëri në dyshim për përfshirje për trafik droge, tjetri, kryeministri, për dyshim në korruptimin e ish-shefit të kundërzbulimit të FBI-së?! Zgjidh e merr Edi Rama! Burrat nuk fshihen pas lojrave të fjalëve!
Ta mirëkuptoj dhe inatin që s’të del me rrëzimin e padisë për kallëzim të rremë ndaj meje, sepse u zgjidh edhe dilema që po vetë ngrite si alibi ditore “ose unë në burg, ose Olsi”.
Ndërkohë, bën mirë të qetësohesh, të mendosh alibinë e rradhës dhe të bëhesh gati për interpelancën e së enjtes! Mos u fshih prapë pas fustanit të grave! Alibia se duke mbrojtur Olsin, po mbron Shqipërinë, nuk ta merr kush seriozisht. Shqipëria dhe Olsi nuk janë e njëjta gjë, edhe pse ti e trajton Shqipërinë si shtëpinë tënde, që e ndan me pjesë për familjarët apo bashkëpunëtorët e tu.
P.s: Me padinë për shpifje nr. 22, bëre gjë, apo e le të tretet me propagandën e ditës?
