Kryeministri i Izraelit, Benjamin Netanyahu, deklaroi se operacioni i përbashkët ushtarak SHBA–Izrael kundër Iranit nuk do të çojë në një “luftë të pafundme”. Në një intervistë për Fox News, ai vlerësoi rolin e presidentit amerikan, Donald Trump, në drejtimin e fushatës së sulmeve ajrore.
Netanyahu theksoi se veprimet ushtarake do të jenë “të shpejta dhe vendimtare”, duke projektuar një rrugëdalje që, sipas tij, do t’i hapë rrugë popullit iranian të marrë në dorë fatin e vet.
“Po dëgjoj njerëzit që thonë se do të keni një luftë të pafundme këtu. Nuk do të ketë luftë të pafundme,” u shpreh Netanyahu në intervistën me Sean Hannity. “Kjo do të jetë një veprim i shpejtë dhe vendimtar, dhe do të krijojmë kushtet që populli iranian të marrë kontrollin e fatit të tij dhe të formojë një qeveri të zgjedhur në mënyrë demokratike.”
Gjatë intervistës, të cilën Trump e promovoi në rrjetet e tij sociale, Netanyahu lavdëroi vendosmërinë dhe qartësinë e presidentit amerikan.
“Nuk ka pasur kurrë një president si Donald J. Trump. Vendosmëria e tij, qartësia e mendimit dhe mënyra si shkon drejt thelbit të çështjes janë të jashtëzakonshme. Jemi shumë me fat që e kemi si lider të botës së lirë,” tha ai.
Duke theksuar rolin udhëheqës të Trump në nisjen e sulmeve ndaj Iranit, Netanyahu rrëfeu edhe një takim në rezidencën Mar-a-Lago në Palm Beach, Florida. Sipas tij, që në fillim të bisedës, Trump kishte theksuar rëndësinë e parandalimit të pajisjes së Iranit me armë bërthamore.
“U takuam në Mar-a-Lago dhe gjëja e parë që më tha Donald Trump ishte: ‘Duhet ta parandalojmë Iranin të sigurojë armë bërthamore’. Ai ma tha menjëherë, pa ia përmendur unë. ‘Duhet të sigurohemi që ata të mos i marrin kurrë armët bërthamore’. Dhe këtë bëri,” u shpreh Netanyahu.
I pyetur përse sulmet ajrore u kryen pikërisht tani, Netanyahu argumentoi se Irani ishte në proces rindërtimi të programit të tij raketor në një shkallë të tillë sa, sipas tij, brenda pak muajsh do të bëhej “imun”.
“Nëse nuk do të vepronim tani, në të ardhmen nuk do të mund të vepronim,” deklaroi ai.