Është mbledhur pasditen e kësaj të premteje Këshilli Kombëtar i PD. Kreu i PD, Sali Berisha në mesazhin e tij drejtuar demokratëve tha se ky është shtatori i fundit që e gjen këtë forcë politike në opozitë.
Berisha u shpreh optimist duke thënë se në zgjedhjet e ardhshme PD do të shpallet fituese dhe do të marrë pushtetin.
Ndërkohë nuk munguan as akuzat në drejtim te qeverisë Rama, ku tha se në 11 vite PS plaçkiti dhe dëboi masivisht shqiptarët.
“Ky është shtatori i fundit që na gjen në opozitë. PD në vitin 2025 merr pushtetin, rrotacioni nuk mund dhe nuk do të vonojë më. Rotacioni është në duart tona, në guximin dhe sakrificën tonë dhe nuk ka asnjë opsion tjetër
Kemi hyrë në muajin e 9 përpara betejës finale elektorale. Në 9 muaj kemi përballjen finale kundër të keqes që në 11 vite asgjësoi procesin e vërtetë elektoral, plaçkiti dhe dëboi masivisht shqiptarët. I them këto se çdo demokrat dhe demokrate kur të kërkojë votën për PD demokratëve duhet ti shihet në sy bindja për fitore, demokratëve duhet ti dëgjohet në zë bindja për fitore, duhet ti lexohet në shpirt bindja për fitore, demokratëve duhet t’u lexohet në trup bindja për fitore, e gjithë kjo sepse më shumë se kurrë fitorja qëndron në guximin, besimin dhe duart tona.
Këto vite PD e plagosën, e plagosën jo pak, kjo nuk mohet. Me sulmin që na u bë kemi luftuar më shumë në mbrojtje sesa në sulm. Duhet të mbronim flamurin tonë, duhet të mbronim programin tonë, pluralizmin politik në Shqipëri që po jepte shpirt, duhet të mbronin opozitën shqiptare.
Sot kjo betejë ka mbaruar, realiteti është krejt i ri, kushtet kanë ndryshuar. Sot ne jemi të bashkuar, sot jemi PDSH më e fortë se kurrë”, tha nder te tjera Sali Berisha.