Kryepeshkopi i Kishës Ortodokse Autoqefale të Shqipërisë, Joan Pelushi ishte i ftuari i kryeministrit Edi Rama në podcastin e tij “Flasim”. Kryepeshkopi Pelushi rrëfeu rreth fëmijërisë së tij dhe momentin kur vendosi që do të bëhej prift.
Ai tregoi momentin kur ka lexuar për herë të parë Ungjillin në moshën 18-vjeçare, ku i lindi dëshira t’i shërbente Zotit.
“Vij nga një familje shumë e madhe dhe jo e krishterë, në atë kohë nuk praktikohej asnjë lloj besimi. Nuk ishte konvertim. Kur lexova për herë të parë Ungjillin, në vitin e 4 të gjimnazit ndodhi diçka thellë brenda meje. Mu kthye sërish gëzimi i fëmijërisë. Në atë çast jeta ime ndryshoi. Pata fatin të njihesha edhe me njerëz që kishin akses në libra të tilla. Bindja për t’u bërë prift lindi atëherë. Liria me barazinë nuk qëndrojnë bashkë, duhet solidarit. Edhe për familjen njerëzore duhet solidaritet, dhe për këtë duhet edhe Perëndia”, u shpreh ai.
Më pas, Kryepeshkopi tregoi se u pagëzua në një bodrum në Shqipëri dhe u largua në SHBA, me premtimin për tu kthyer në vendlindje kur Kisha të hapej.
“Pas leximit të Ungjillit, unë u pagëzova në Shqipëri, Nuni ishte Petro Zheji. U pagëzova nga një prift hero, në bodrumin e shtëpisë së tij. Ndaj ishte edhe lidhja me Kishën Ortodokse sepse aty u pogëzova. Dhe më pas shkova në Amerikë, për të studiuar. Por unë u thashë që në momentin që Kisha do hapej atje unë do të kthehem”- u shpreh Kryepeshkopi.
Po ashtu në podcast kryeministri Edi Rama tregoi miqësinë e hershme me kryepeshkopin.
“Ne kemi njohje shumë të vjetër dhe kemi folur për këto tema duke bërë ecejake mbrëmjeve në rrugën Myslym Shyri deri pas mesnate, flitet për vitet 80 dhe as nuk mendohej që ne do të dilnim në botën e lirë dhe do të kishim lirë të praktikonim fenë”– tha Rama.