Kremlini ka njoftuar se Presidenti rus Vladimir Putin është ftuar të jetë pjesë e “Bordit të Paqes” nga Donald Trump, i krijuar javën e kaluar me qëllim mbikëqyrjen e armëpushimt në Gaza.
Zëdhënësi i Kremlinit, Dmitry Peskov, u tha gazetarëve se Rusia po kërkonte të “sqaronte të gjitha nuancat” e ofertës me Uashingtonin, përpara se të jepte përgjigjen e saj.
Ftesa e pretenduar vjen në një kohë kur Putin nuk tregon shenja se do t’i japë fund pushtimit të Ukrainës , në të cilin qindra mijëra njerëz janë vrarë dhe trupat ruse kanë kryer mizori të shumta kundër civilëve. Presidenti rus ka hedhur poshtë vazhdimisht propozimet për armëpushim përgjatë fronteve aktuale.
“Ftesa për Putinin, e cila ende nuk është konfirmuar nga Uashingtoni, ngre më shumë pyetje rreth axhendës së synuar për bordin. Fillimisht, ajo ishte pjesë e propozimeve të Trump për armëpushim për luftën në Gaza dhe supozohej të mbikëqyrte kalimin drejt një paqeje të qëndrueshme në territor dhe të mbikëqyrte punën e një komiteti ekspertësh palestinezë, i cili u njoftua gjithashtu javën e kaluar, i cili do të kujdesej për drejtimin e përditshëm të Gazës. Skema e përshkruar në mënyrë të paqartë u miratua në një rezolutë të Këshillit të Sigurimit të OKB-së në nëntor”, shkruan The Guardian.
Emërimet e para në bord, të njoftuara të premten, përfshinin vetë Trumpin si kryetar, ish-kryeministrin britanik Tony Blair, sekretarin aktual të shtetit të SHBA-së, Marco Rubio; të dërguarin e Trumpit për zgjidhjen e problemeve, zhvilluesin e pronave Steve Witkoff; dhëndrin e presidentit Jared Kushner; dhe presidentin e Bankës Botërore, Ajay Banga.