Këshilli i Lartë Gjyqësor ka pezulluar nga detyra për 6 muaj gjyqtaren Arta Llazari. KLGJ ka pranuar pjesërisht kërkesën e Inspektoratit të Lartë të Drejtësisë, për shkarkimin e gjyqtares së Shkodrës, për mosvënie në lëvizje të çështjeve civile për vite me radhë, si dhe shkelje të afateve procedurale të arsyetimit të vendimeve gjyqësore në mënyrë të përsëritur.
Ndërkohë gjyqtarja Llazari tha se ka patur ngarkesë të lartë në punë.
Gjyqtarja Arta Llazari u konfirmua në detyrë nga Komisioni i Pavarur i Kualifikimit më 13 shkurt 2023, ndërsa dy çështje të gjykuara prej saj u dërguan për verifikime të mëtejshme pranë Inspektorit të Lartë të Drejtësisë. Gjatë seancës dëgjimore ajo dha shpjegime për burimet që kishin shërbyer për krijimin e pasurive të saj dhe të prindërve me të cilët jeton, si dhe për transaksione të disa vlerave monetare nga prindërit, për të cilat deklaroi se i përkisnin vëllait.