Kryeministri Edi Rama ka provokuar mijëra qytetarë që po protestojnë poshtë zyrës së tij kundër ndërtimit në Zvërnec.
Nga Zvërneci ku ndodhet në një takim më banorët e zonës, Rama tha se jo 5 mijë, por as 500 mijë veta të dalin në shesh nuk mjaftojnë që ai të jap dorëheqje, pasi më shumë se 800 mijë persona e kanë votuar atë dhe Partinë Socialiste.
“Jo 5 mijë veta, por 500 mijë të dalin në shesh, nuk mjaftojnë, janë 800 e ca kusur mijë që kanë bërë marrëveshje me mua dhe PS. Ky investim nuk doli sot papritur. Unë e kam thënë në fushatë. Unë isha në Tivat, erdha direkt nga Tivati këtu… Tivati ishte vendi më i pazhvilluar në Mal të Zi, nuk shkonin turistë se ishte bazë ushtarake”- u shpreh Rama.
“Këta që kanë dalë të protestojnë i duan pagat si në Amerikë mbase. I duan si në Manhatan. Nuk e di çfarë duan këta. Pagat në sistemin e turizmit tonë janë si në Greqi, ose më shumë si në Greqi. Këtu nuk është: ‘Sa të të jap?’. Këtu është: ‘Hajde të punosh’. Në Tivat, të gjithë ata që takova atje ishin malazez”– shtoi ai.
Ndërkohë ditën e nesërme janë parashikuar dy protesta. Në orën 11:00 do të protestohet në Zvërnec, ndërsa në 18:00 sërish në Tiranë.