Ish-kryebashkiaku i Shkodrës, Bardh Spahia, ka folur sot për mediat pas përfundimit të seancës paraprake në GJKKO, teksa akuzohet për veprën penale “Pengime për ekzekutimin e vendimeve të gjykatës”.
Spahia tha se nuk pranoi për gjykim të shkurtuar, për faktin se padia e ngritur ndaj tij është përgatitur në zyrat e Partisë Socialiste. Madje është përdorur një person i dënuar për vjedhje dhe korrupsion për padinë për ta përdorur politikisht në kohë elektorale.
Ndërkohë e konsideroi si qesharake akuzën që SPAK ka ngritur ndaj tij.
”Ishte formalitet i gjykatës për ta dërguar çështjen time për gjykim. Nuk pranova gjykimin e shkurtuar, kërkova gjykimin normal duke qene i bindur se është padi e përgatitur në zyrat e PS, të cilët përdorin një person të dënuar për vjedhje dhe korrupsion, për të ngritur padi ndaj meje për ta përdorur politikisht në kohë elektorale.
Akuza nuk qëndron. Në gjithë veprimtarinë time kam patur udhërrëfyes zbatimin e ligjit dhe mbrojtjen e interesave të qytetarëve të mi.
Kam zbatuar vetëm ligjin. Akuza dhe padia është e ngritur mbi baza dhe porosi politike që do marrin përgjigjen e duhur më 11 maj. Nuk do të na ndalojë apo ngadalësojnë në rrugën e fitores më 11 maj.
Unë besoj te domosdoshmëria e zbatimit të ligjit dhe respektimit të tij nga çdo qytetar dhe strukturë shtetërore.
Akuza është qesharake, absurde. Bëhet fjalë për një padi për shkarkimin e një ish drejtori që kam qenë kryetar i bashkisë, dhe në funksionin e kryetrarit të asamblesë së sha Ujësjellësi Shkodër”- u shpreh Spahia.