Hungaria do të tërhiqet nga Gjykata Ndërkombëtare Penale, tha qeveria e saj të mërkurën, ndërsa kryeministri i vendit Viktor Orban mirëpriti në Budapest kryeministrin izraelit dhe të arratisurin nga ICC, Benjamin Netanyahu.
Vizita e Netanyahut në Hungari shënoi herën e parë që lideri izraelit shkeli në tokën evropiane që kur kjo Gjykatë lëshoi një urdhër arresti kundër tij në maj 2024. Gjykata tha se kishte “baza të arsyeshme” për të besuar se Netanyahu mban përgjegjësi penale për krimet e luftës duke përfshirë “vrasjen nga uria si metodë e luftës” dhe “vrasjet, krimet dhe aktet e tjera kundër njerëzimit”.
ICC nuk ka fuqitë e veta për zbatimin e ligjit, kështu që mbështetet në shtetet e saj anëtare për të arrestuar dhe transferuar të dyshuarit në Hagë. Si nënshkruese, Hungaria është e detyruar të arrestojë Netanyahun.
Sekretari i Shtetit i Hungarisë për Komunikimin dhe Marrëdhëniet Ndërkombëtare Zoltan Kovacs tha se vendi do të fillojë procesin e tërheqjes të enjten, “në përputhje me detyrimet kushtetuese dhe ligjore ndërkombëtare të Hungarisë”.
Nëse do të përfundojë me tërheqjen, Hungaria do të bëhet i vetmi vend i Bashkimit Evropian që nuk do të jetë pjesë e Gjykatës Ndërkombëtare Penale.
Izraeli nuk është pjesë e gjykatës, krahas Shteteve të Bashkuara, Kinës, Rusisë, Arabisë Saudite dhe vendeve të tjera.