Ish-kryeministri Sali Berisha nuk i ka ndalur akuzat ndaj kryebashkiakut Erion Veliaj, përsa i përket inceneratorit të Tiranës.
Në konferencën për mediat, ai tha se Veliaj është përgjëgjësi kryesor i kësaj afere, teksa u ndal edhe te deklarata e kryebashkiakut pak ditë më parë, ku ky i fundit deklaronte se ata që kanë gabuar duhet të mbajnë përgjegjësi.
Sipas Berishës, veprimi i Veliajt nuk ka qenë gabim por krim, pasi e ka kryer zëvendësimin e procedurës me vetëdije të plotë, por kërkon që para SPAK të dalë si viktimë e Zotos dhe Mërtirit.
“Meqë jemi te vjedhja e shekullit, mund të them se kjo është mashtrimi i shekullit ose shakaja e shekullit. Javën e kaluar ju njoftova se Veliaj dhe SPAK-i i partisë duan të paraqesin Erionin viktimë të pronarëve në letra dhe vetëm në letra Zoto dhe Mërtiri.
Sot do të ndalem vetëm në deklaratën e tij se nëse dikush ka bërë gabime të mbajë përgjegjësi një për një.
Sipas Veliajt vjedhja e shekullit nuk është vepër penale, nuk është krim i shëmtuar, por vetëm gabim. Me këtë rast i themi Veliajt se përgjegjësit numër një për vjedhjen e shekullit se nuk bëhet fjalë për gabime, por vepra penale dhe krime, ndaj dhe Prokuroria e Posaçme ka lëshuar një numër urdhër-arrestesh dhe gjykata ka burgosur zyrtarë e të tjerë. Nuk është gabim, por krim i Veliajt kalimi i mbetjeve në praktikën me djegie, e cila sipas KLSH-së është dy herë më e kushtueshme se e para. Është krim i Veliajt, zëvendësim i procedurës së djegësit të Elbasanit dhe Fierit me tender publik me procedurën e dhënies me koncesion ose PPP i cili e detyron koncesionarin t’i paguajë Veliajt”, deklaroi Berisha.