Pas akuzave të Partisë Demokratike ndaj Presidentit Bajram Begajt, për punësimin e tij në një klinikë private por edhe të djalit të tij në një kompani sigurimi në Shqipëri, erdhi edhe reagimi i Presidencës, që i mohonte akuzat e PD.
Por, pas reagimit të Presidencës, kreu i grupit parlamentar të PD, Gamzent Bardhi, ka publikuar edhe provat që tregojnë se djali i Presidentit Bajram Begaj është i punësuar në kompaninë e sigurimeve ANSIG, me një pagë 30 mijë euro në vit.
Ndërkohë, e njëjta kompani është e lidhur me Presidencën, pasi ka qenë përfituese e dhjetëra tenderave nga ky institucion.
Postimi i Gazment Bardhit:
Si gjithmonë, Bajram Begaj foli, por nuk tha asgjë!
Çfarë e pengoi “Doktorin e Mrekullive”, njëherazi Presidenti, të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit? Sado që të shmanget e të përdridhet Presidenti i çnderuar, përgjigja është vetëm një: Korrupsioni dhe përfitimi i paligjshëm i Presidentit!
Fotot më poshtë janë marrë nga dokumente zyrtare të deklarimit të pasurive dhe nga Thesari i Shtetit. Një shpjegim i shkurtër i tyre: I biri i Presidentit jeton në Gjermani, ku paguhet nga një spital si mjek. Por, 6 muaj pas emërimit të babait president, paguhet edhe në Shqipëri nga kompania e sigurimeve, me të cilën ka kontratë prokurimi presidenca. Pagesa është 30 mijë euro në vit.
Ky është vetëm një nga rastet skandaloze për të cilat kemi kërkuar shkarkimin e Presidentit të çnderuar Bajram Begaj. Ka edhe të tjera. Prandaj, Kuvendi nuk mund të mbyllë sytë përpara korrupsionit, që nis nga maja e shtetit.
