Plani i Infantinos për të shitur aksione të Kupës së Botës përballet me revoltë globale në futboll
Presidenti i FIFA-s, Gianni Infantino, u ka dërguar një letër të 211 federatave anëtare, duke u ofruar secilës 40 milionë dollarë (rreth 35 milionë euro) nëse mbështesin planin e tij të debatueshëm për shitjen e aksioneve në kompeticionet kryesore të organizatës.
Propozimi, që mund të ndryshojë rrënjësisht të ardhmen komerciale të Kupës së Botës, ka shkaktuar reagime të forta nga organizmat më të rëndësishëm të futbollit në Evropë dhe në mbarë botën.
Infantino prezantoi planin për krijimin e një kompanie me vlerë 20 miliardë dollarë (17.5 miliardë euro), e cila do të menaxhojë aktivitetet më të rëndësishme të FIFA-s me pjesëmarrjen e investitorëve privatë.
Kompania e re, e quajtur FIFA Forward Enterprise (FFE), do të administrojë turne si Kupa e Botës dhe Kupa e Botës për Klube, ndërsa investitorëve privatë do t’u jepet mundësia të blejnë aksione në të.
Sipas raportimeve të The Times, mes investitorëve të mundshëm përmendet edhe familja e Jared Kushner, dhëndrit të presidentit amerikan Donald Trump. Kjo ka shtuar shqetësimet për lidhjet politike të projektit. Ish-presidenti i FIFA-s, Sepp Blatter, kritikoi afërsinë mes Infantinos dhe Trumpit, ndërsa komisioneri evropian për Sportin, Glenn Micallef, deklaroi: “Larg duart nga futbolli ynë.”
UEFA: Futbolli nuk është në shitje
UEFA ishte ndër organizatat e para që reagoi ashpër ndaj propozimit, duke theksuar se futbolli nuk mund të trajtohet si një aset tregtar.
“Ky është një kufi që institucionet drejtuese të futbollit nuk duhet ta kalojnë kurrë. UEFA e merr këtë çështje jashtëzakonisht seriozisht dhe çdo federatë kombëtare duhet të bëjë të njëjtën gjë”, thuhet në deklaratën e organizatës.
Më tej, UEFA theksoi se “shpirti dhe qeverisja e futbollit nuk janë pasuri që mund të shiten, veçanërisht pa asnjë transparencë se kush përfiton financiarisht.”
Edhe zëvendëspresidenti i UEFA-s, Gabriele Gravina, u shpreh kundër projektit.
“Futbolli nuk mund të reduktohet në një çështje private. Rrezikojmë të shkatërrojmë ekuilibrin e ndërtuar ndër vite mes futbollit si sport dhe pasion popullor, në favor të një vizioni thjesht biznesi”, deklaroi ai.
UEFA do të zhvillojë një mbledhje urgjente për të koordinuar qëndrimin e saj ndaj planit të FIFA-s.
Tebas: Infantino po blen mbështetje
Presidenti i La Ligës, Javier Tebas, akuzoi Infantinon se po përdor paratë për të siguruar mbështetje politike përpara Kongresit të ardhshëm të FIFA-s.
“FIFA po premton më shumë se 10 miliardë dollarë dhe deri në 20 milionë dollarë për secilën federatë, ndërkohë që po përgatitet të sjellë investitorë privatë në kompeticionet e saj. Kjo nuk duket si reformë, por si një fushatë zgjedhore e financuar në kurriz të së ardhmes së futbollit”, shkroi Tebas.
Ai shtoi se zhvillimi i futbollit nuk mund të përdoret për të blerë vota apo për të heshtur kritikat.
Federata Angleze: Nuk dinim asgjë
Federata Angleze e Futbollit deklaroi se nuk ishte informuar paraprakisht për projektin dhe shprehu shqetësim për mungesën e transparencës dhe të procedurave.
“Kur propozimi të paraqitet në mënyrë të plotë dhe transparente, atëherë do të japim qëndrimin tonë”, tha një zëdhënës i federatës.
Gjermania: Është kaluar vija e kuqe
Edhe Federata Gjermane e Futbollit (DFB) iu bashkua kritikave. Zëvendëspresidenti Hans-Joachim Watzke e cilësoi planin si një sulm të drejtpërdrejtë ndaj futbollit.
“Nëse futbolli evropian qëndron i bashkuar kundër këtyre planeve, kjo do të ketë një peshë të madhe”, deklaroi ai.
Franca kërkon koordinim evropian
Presidenti i Federatës Franceze të Futbollit, Philippe Diallo, kritikoi mungesën e konsultimeve me federatat kombëtare.
“U njohëm me këtë projekt vetëm përmes mediave. Nuk kemi asnjë informacion konkret dhe kemi shumë pikëpyetje për një projekt që prek drejtpërdrejt të ardhmen e futbollit”, tha ai.
Diallo njoftoi se do të nisë menjëherë konsultimet me homologët e tij evropianë për të koordinuar një reagim të përbashkët.
Kundërshtime edhe jashtë Evropës
Rezerva ndaj planit të FIFA-s janë shprehur edhe nga Konfederata Aziatike e Futbollit (AFC), CONCACAF, që përfaqëson Amerikën e Veriut, Qendrore dhe Karaibet, si edhe organizma të tjerë ndërkombëtarë.
AFC deklaroi se nuk ishte konsultuar për projektin dhe theksoi se iniciativa të kësaj përmase duhet të bazohen në qeverisje të mirë, transparencë dhe konsultim të gjerë.
Edhe CONCACAF shprehu shqetësim për mënyrën se si u prezantua projekti.
“Si drejtues të futbollit kemi përgjegjësi të mbrojmë interesat e sportit. Çdo vendim duhet të mbështetet në procese transparente dhe në interesin afatgjatë të futbollit”, thuhet në reagimin e konfederatës.
Afati deri më 19 shtator
FIFA u ka lënë federatave anëtare afat deri më 19 shtator për të pranuar propozimin dhe për të përfituar nga paketa financiare. Megjithatë, deri tani oferta nuk ka zbutur kundërshtimet, ndërsa organizatat kryesore të futbollit vazhdojnë të kërkojnë transparencë, konsultim dhe respektim të rregullave të qeverisjes së sportit.