Presidenti i Ukrainës, Volodymyr Zelensky, do të takohet të martën në Uashington me Presidentin e Shteteve të Bashkuara, Donald Trump, njoftoi një zyrtar i Shtëpisë së Bardhë, në kuadër të përpjekjeve të ripërtërira për t’i dhënë fund luftës me Rusinë.
“Presidenti Zelensky është planifikuar të takohet me Presidentin Trump në Shtëpinë e Bardhë të martën,” tha zyrtari i Shtëpisë së Bardhë për AFP, duke folur në kushte anonimiteti, të premten.
Zelensky deklaroi këtë javë se kishte biseduar me të dërguarin e Trumpit, Steve Witkoff, si edhe me dhëndrin e Presidentit amerikan, Jared Kushner, në kuadër të përpjekjeve për të ringjallur bisedimet e ndërprera që synojnë t’i japin fund luftës katërvjeçare.
Përpjekjet e udhëhequra nga Shtetet e Bashkuara për t’i dhënë fund luftës kanë ngecur, pasi Uashingtoni e zhvendosi vëmendjen te konflikti me Iranin.
Trump dhe Zelensky kanë pasur një marrëdhënie të tensionuar, që nga përplasja e ashpër në Zyrën Ovale në shkurt të vitit 2025, deri te përmirësimi i marrëdhënieve gjatë muajve të fundit.
Këtë javë, presidenti ukrainas u takua edhe me influencuesen amerikane të krahut të djathtë dhe aleaten e Trumpit, Laura Loomer, një tjetër shenjë e përmirësimit të marrëdhënieve.
Komentatorja konservatore 33-vjeçare, e cila ndiqet nga miliona persona në rrjetet sociale, kohët e fundit ka zbutur qëndrimin e saj ndaj Ukrainës.
“Kjo është përditshmëria e çdo ukrainasi. Ndihem vërtet keq që e kam minimizuar vuajtjen e ukrainasve gjatë pesë viteve të fundit,” tha ajo, duke iu referuar përvojës së saj.
Të enjten, Trump ripublikoi një nga postimet e Loomer në rrjetet sociale lidhur me takimin e saj me Zelenskyn, duke e shoqëruar me mbishkrimin: “Shumë mirë!!”
Zelensky pritet të takohet me Trumpin në të njëjtën ditë kur në Uashington do të mbahet ceremonia përkujtimore për senatorin amerikan Lindsey Graham, një mbështetës i kahershëm i Ukrainës, i cili ndërroi jetë më herët këtë muaj në moshën 71-vjeçare.
Po atë ditë, Trump pritet të zhvillojë edhe një takim me Kryeministrin izraelit, Benjamin Netanyahu.