Sulmet e SHBA ndaj Iranit janë intensifikuar ndjeshëm, ndërsa po afrohet afati i vendosur nga presidenti amerikan Donald Trump, i cili ka kërcënuar me “ferr” nëse Teherani nuk hap ngushticën strategjike të Hormuzit.
Autoritetet iraniane nuk kanë dhënë asnjë shenjë se do t’i përgjigjen ultimatumit për të hapur rrugën detare deri në fund të së martës. Ndërkohë, sipas mediave iraniane, gjatë ditës janë goditur ura hekurudhore dhe rrugore, një aeroport dhe një impiant petrokimik, ndërsa janë dëmtuar edhe linja të energjisë elektrike.
Nga ana tjetër, Irani ka paralajmëruar se nuk do të përmbahet më në goditjen e infrastrukturës së vendeve fqinje në Gjirin Persik, duke pretenduar se ka kryer sulme të reja ndaj një anijeje dhe objekteve industriale në Arabinë Saudite të lidhura me kompani amerikane.
Një burim i lartë iranian i tha agjencisë Reuters se Teherani ka refuzuar një propozim për armëpushim të përkohshëm. Sipas tij, bisedimet për paqe mund të nisin vetëm nëse SHBA dhe Izraeli ndalojnë sulmet, japin garanci se nuk do t’i rinisin dhe ofrojnë kompensim për dëmet.
Donald Trump i ka dhënë Iranit afat deri në orën 20:00 me orën e Uashingtonit për t’i dhënë fund bllokadës së naftës në Gjirin Persik. Në të kundërt, ai ka kërcënuar se brenda katër orësh do të shkatërrojë ura dhe centrale energjetike në Iran.
Teherani është përgjigjur se do të godasë infrastrukturën e aleatëve të SHBA-së në rajon, duke paralajmëruar pasoja të rënda për qytetet që varen nga energjia dhe furnizimi me ujë.
Pavarësisht përshkallëzimit në terren dhe retorikës së ashpër, tregjet globale kanë reaguar me hezitim, duke pritur nëse kërcënimet e Trump do të realizohen apo do të tërhiqen, si në raste të mëparshme.
Ndërkohë, përpjekjet ndërmjetësuese nga Pakistani për një armëpushim të përkohshëm janë në një fazë delikate, por ende pa rezultate konkrete.
Irani ka paraqitur një plan me kushte që përfshijnë përfundimin e përhershëm të luftës, heqjen e sanksioneve dhe rindërtimin e zonave të dëmtuara. Gjithashtu, kërkohet një mekanizëm i ri për kontrollin e kalimit në Ngushticën e Hormuzit, një rrugë jetike për tregtinë globale të energjisë.