Ish-presidenti i Shteteve të Bashkuara, Bill Clinton, po dëshmon aktualisht para ligjvënësve amerikanë lidhur me marrëdhënien e tij me financierin e ndjerë Jeffrey Epstein.
Seanca e pyetjeve po zhvillohet me dyer të mbyllura dhe larg pranisë së mediave. Burime nga Kongresi bëjnë të ditur se dëshmia është pjesë e një hetimi më të gjerë mbi rrjetin e lidhjeve dhe bashkëpunëtorëve të Epstein.
Një ditë më parë ka dëshmuar edhe ish-Sekretarja amerikane e Shtetit, Hillary Clinton, e cila u paraqit para një komiteti të Dhoma e Përfaqësuesve e Shteteve të Bashkuara në një seancë që zgjati rreth gjashtë deri në shtatë orë.
Sipas deklaratave të saj, Hillary Clinton mohoi të ketë pasur dijeni për aktivitetet kriminale të Epstein apo të bashkëpunëtores së tij, Ghislaine Maxwell. Ajo theksoi se nuk e kujton të jetë takuar ndonjëherë me Epstein dhe se nuk ka fluturuar me avionin e tij privat, nuk ka vizituar ishullin apo pronat e tij.
Clinton deklaroi gjithashtu se nuk posedon asnjë informacion që mund të ndihmojë hetimin mbi veprimtarinë e tyre të paligjshme.
Në përfundim të dëshmisë, ajo kritikoi ashpër komitetin hetimor të udhëhequr nga republikanët, duke pretenduar se procesi po përdoret për qëllime politike dhe për të shqetësuar presidentin aktual, Donald Trump, duke e cilësuar të gjithë procedurën si “teatër politik”.
Hetimet mbi çështjen Epstein vijojnë, ndërsa priten zhvillime të reja nga dëshmia e Bill Clinton gjatë orëve në vijim.