Dubai ka shtuar edhe një rekord të ri në horizontin e tij. Ciel Tower, hoteli më i lartë në botë, sapo është hapur zyrtarisht duke u ngritur 377 metra mbi Dubai Marina, një lartësi që, sipas zhvilluesve, nuk ishte as e planifikuar.
CEO i The First Group, Rob Burns, thotë se projekti nisi si një ide për të ndërtuar diçka “spektakolare”, por jo domosdoshmërisht më të lartën në botë. Megjithatë, ndërsa planet ndryshonin vazhdimisht, ndërtesa vazhdoi të rritej.
Ciel ngrihet mbi një sipërfaqe shumë të kufizuar prej vetëm 3,600 metrash katrorë, duke e detyruar arkitektin Yahya Jan të ndërtonte vertikalisht dhe me kreativitet. Ndërsa hyrja është elegante por e vogël për standardet e Dubait, madhështia shfaqet kat pas kati.
Hoteli ka 1,004 dhoma në 82 kate, me pamje mahnitëse drejt Dubai Marina, Palm Jumeirah dhe Gjirit. Edhe pse konkurrenca e tregut është e fortë, zhvilluesit janë optimistë se pamjet panoramike dhe ambientet e superiores do ta veçojnë Ciel-in nga të tjerët.
Tipari më i veçantë i ndërtesës është një hapësirë e madhe e zbrazët, që arkitekti e quan “syri i gjilpërës”. Kjo hapësirë lejon kalimin e erës përmes godinës, duke zvogëluar presionin e saj mbi strukturën, një teknikë e rëndësishme në ndërtesat super të larta.
Gjithashtu, përgjatë kullës janë ndërtuar një seri atriumesh me pemë dhe bimësi, që shërbejnë si “parqe vertikale”, zona sociale, si dhe përmirësojnë ndriçimin dhe ftohjen natyrale.
Në kate të ndryshme të kullës janë hapur tetë restorante, përfshirë markën britanike Tattu, e pozicionuar në nivelet më panoramike.
Pika më fotografike e hotelit është pishina infinity në katin 76, e vendosur brenda hapësirës vertikale që lejon kalimin e erës. Uji duket sikur tretet në qiell, duke krijuar një efekt vizual spektakolar.