Aktori i njohur i humorit, Elvis Pupa ka reafuar lidhur me lajmin që qarkulloi dje në media se ai dhe bashkëshortja e tij kishin ngritur një shtëpi bari në Australi, ku çifti jeton prej vitesh.
Në reagimin në rrjete sociale, Pupa mohon që të jetë arratisur, siç pretendojnë mediat australiane, por shtoi se ndodhet në Tiranë prej më shumë se 1 muaji për shkak të angazhimeve profesionale.
Sipas Pupës, çdo përpjekje për ta paraqitur këtë situatë ndryshe është një manipulim i pastër i informacionit.
Sa i përket “shtëpisë së barit”, aktori i humorit shprehet se bëhet fjalë për një proces gjyqësor që është ende në zhvillim ndërsa nënvizon se bashkëshortja e tij, Belina Pupa është e lirë.
Kujtojmë se dje mediat australiane shkruanin se bashkëshortja e aktorit të njohur shqiptar, doli të martën përpara Gjykatës së Magjistraturës në Adelaide pas akuzave për kultivim kanabisi dhe ndërhyrje të paligjshme në furnizimin me energji elektrike.
Sipas dokumenteve gjyqësore, ngjarja dyshohet të ketë ndodhur në periudhën 1 janar – 4 prill 2025, në një pronë në Ascot Park, ku janë zbuluar 43 bimë kanabisi.
Reagimi i plotë:
Të dashur miq, ridjekës dhe bashkëpunëtorë,
Jam i detyruar të reagoj pas disa lajmeve të pavërteta dhe keqdashëse që po qarkullojnë në media, sipas të cilave unë gjoja “jam arratisur” dhe “ndodhem në kërkim”. Dua ta bëj shumë të qartë: prej më shumë se një muaji ndodhem në Tiranë, ku po zhvilloj angazhime të rregullta profesionale, të planifikuara në Shqipëri dhe më gjerë në Europë.
Çdo përpjekje për ta paraqitur këtë situatë ndryshe është një manipulim i pastër i informacionit, një keqinterpretim i qëllimshëm që synon të bëjë lajm aty ku nuk ka asgjë të jashtëzakonshme.
Sa i përket bashkëshortes sime, Belina, ajo vazhdon aktivitetin e saj profesional dhe është plotësisht e lirë. E gjithë situata që po trajtohet aktualisht është pjesë e një procesi ligjor që është ende në zhvillim, dhe siç është shprehur edhe ajo vetë, i takon drejtësisë të flasë e fundit.
Fatkeqësisht, kemi parë një keqpërdorim të rëndë të lajmit, me qëllim sensacionalizmi dhe klikimesh, ku deformimi ka marrë vendin e të vërtetës. Jetët tona janë publike, por kjo nuk i jep askujt të drejtën të abuzojë me dinjitetin e njerëzve.
Jeta vazhdon normalisht, me punën dhe përgjegjësitë tona të përditshme. Ne do të përballojmë çdo situatë me qetësi, transparencë dhe respekt për të vërtetën.
Faleminderit për mirëkuptimin dhe mbështetjen që shumë prej jush na kanë treguar.
Me respekt,
Elvis Pupa