Gjykata e Posaçme ka vendosur sekuestrimin e 2 pasurive të Monika Kryemadhit, pas kërkesës së SPAK.
Mësohet se GJKKO ka vendosur sekuestron e 2 vilave në pronësi të deputetes së Partisë së Lirisë dhe nënës së saj, Fatime Kryemadhit. Vilat ndodhen te “Kodra e Diellit”.
Kujtojmë se Apeli i GJKKO-së la në fuqi ditën e djeshme masën e sigurisë “detyrim paraqitje” për Kryemadhin dhe “arrest me burg” për ish-bashkëshortin e saj, Ilir Metën.
3 akuzat që rëndojnë ndaj deputetes Monika Kryemadhi, të njëjta me ato të kreut të Partisë së Lirisë, Ilir Meta, janë: Korrupsion, pastrim parash dhe mosdeklarim pasurie
Njoftimi i SPAK
Me kërkesën e SPAK, Gjykata e Posaçme vendos sekuestro preventive ndaj pasurive të shtetasve F.K dhe M.K
Mbi bazën e kërkesës së SPAK, Gjykata e Posaçme e Shkallës së Parë kundër Korrupsionit dhe Krimit të Organizuar përmes vendimit nr.640 të datë 15 nëntor 2024, ka vendosur masën e sigurimit pasuror ‘Sekuestro preventive’ për dy prona në pronësi të shtetasve F.K dhe M.K.
Kjo masë vjen si vijim i veprimeve hetimore dhe proceduriale në lidhje me procedimin penal nr. 122 të vitit 2022.
Pasuritë e sekuestruara janë:
- Ndërtesë në Selitë, Tiranë me sipërfaqe;
kati përdhes, 152 m2, nga të cilat 82 m2 banesë dhe 70 m2 verandë;
kati nëntokë 139 m2,
kati i parë 79 m2,
kati i dytë 51 m2, verande kati i dytë 27.9 m2 – në pronësi të shtetases F.K., me adresë Rezidenca “Kodra e Diellit”.
Ndërtesë në Selitë, Tiranë me sipërfaqe;
kati përdhes 152 m2, nga të cilat 82 m2 banesë dhe 70 m2 verandë,
kati nëntokë 139 m2,
kati i parë 79 m2,
kati i dytë 51 m2, verandë kati i dytë 27.9 m2, në pronësi të M.K., me adresë Rezidenca “Kodra e Diellit”.
Vendimi i Gjykatës së Posaçme është ekzekutuar nga policia gjyqësore në datat 19 dhe 20 Nëntor 2024, duke vendosur bllokimin e pasurive në regjistrat e Agjencisë Shtetërore të Kadastrës, si dhe duke ua komunikuar këtë vendim pronarëve të pasurive.