Siguria e godinës nga grabitësit e jashtëm duket se është një nga prioritetet kryesore të Bankës së Shqipërisë, që për ironi të fatit, prej krijimit të saj është vjedhur vetëm nga grabitësit e brendshëm me uniformë.
Por për të parandaluar grabitjet nga kriminelët, Banka e Shqipërisë ka hapur 2 tendera për sigurinë e godinës. Tenderi i parë është për “Blerjen e 24 copë pajisje pistoleta muskul paralizuese (electric shock)”, me fond limit 56 milionë lekë të vjetra.
Oferta duhet të paraqitej deri në datën 5 Tetor, çfarë do të thotë se është shpallur edhe fituesi i këtij tenderi, që do t’i sigurojë Bankës 24 pistoleta elektroshok, me vlerë afërsisht 2.3 milionë lekë të vjetra secila.
“Banka e Shqipërisë kërkon të realizojë objektin e prokurimit: “Blerje 24 copë pajisje pistoleta muskul paralizuese (electric shock) për nevojat e Bankës së Shqipërisë”.
“Banka e Shqipërisë fton kandidatët e interesuar, të marrin pjesë në procedurën e prokurimit “Tender i hapur kombëtar”, për realizimin e objektit të prokurimit si më sipër, me fond limit 5,600,000 Lekë””, thuhet në njoftimin e Bankës së Shqipërisë.
Ndërkohë, tenderi i dytë ka të bëjë me “Blerjen dhe implementimin e një sistemi të qendërzuar ngjarjesh të sigurisë (SIEM)”, me fond limit 418 milionë lekë të vjetra. Ofertat duhet të paraqiten deri më datë 30 Tetor, pra ka kohë edhe 12 ditë deri në shpalljen e fituesit.
“Banka e Shqipërisë kërkon të realizojë objektin e prokurimit: “Blerje dhe implementim i një sistemi të qendërzuar ngjarjesh të sigurisë (SIEM) për nevojat e Bankës së Shqipërisë”.
“Banka e Shqipërisë fton kandidatët e interesuar, të marrin pjesë në procedurën e prokurimit “Tender i hapur kombëtar”, për realizimin e objektit të prokurimit si më sipër, me fond limit 41,800,000 Lekë”, njofton Banka e Shqipërisë.
Sigurisht që mbrojtja e godinës është e rëndësishme, por Banka e Shqipërisë duhet të marrë më shumë masa për rënienm e inflacionit, që po zgjat më shumë se në vendet e tjera.
