Mediat italiane kanë zbardhur dëshminë e prindërve të Mark Samson, autorit të vrasjes së studentes shqiptare Ilaria Sula, ngjarja kjo e ndodhur pak ditë më parë ne Itali. Nëna e autorit ka pranuar para hetuesve se nuk e donte në shtëpi Ilarian, pasi shpërqëndronte djalin e saj.
“Ajo nuk e shihte me sy të mirë. Aq sa nuk e donte as pranë shtëpisë. Një qëndrim që, ndoshta, nuk ishte vetëm pasojë e një mentaliteti kulturor të Nors Mazlapan, nënës së Mark Samsonit, por fshihte diçka më të thellë,” shkruan Corriere della Sera. Një lloj armiqësie ndaj Ilaria Sula-s, vajzës që për afro një vit frekuentonte apartamentin e vogël të familjes filipinase në rrugën Homs.
“Nuk doja që Marku ta sillte gjithmonë Ilarian në shtëpi. Kisha frikë se ajo e shpërqendronte shumë: djali im duhet të qëndrojë i përqendruar në studime,” ka thënë ajo për hetuesve.
Ilaria Sula, 22-vjeçarja me origjinë shqiptare që u vra nga i dashuri i saj filipinas, ishte goditur 4 herë me thikë në qafë.
Autopsia e kryer nga ekspertët, detaje të së cilës janë publikuar nga mediat italiane, ka arritur në konkluzionin se studentja e re humbi jetën për shkak të shokut hemorragjik.
Dyshohet se krimi ndodhi në dhomën e gjumit të 23-vjecarit, ku janë gjetur gjurmë gjaku edhe pse ishte punuar shumë për fshirjen e tyre. Ndërsa në makinën e Mark Sampson nuk kishte gjurmë të tilla, çka ka ngritur dyshimet se trupi është transportuar me një mjet tjetër.