Detaje të reja janë zbardhur nga vrasja e 14 vjeçarit Eraldo Xhejo në fshatin Pirg, Maliq ndërsa për krimin e rëndë janë arrestuar 8 persona, mes tyre autori Enedio Guri, babai dhe xhaxhai i tij dhe pesë të tjerë.
Mësohet se e gjithë ngjarja tronditëse është kapur nga kamerat e sigurisë të lokalit në Pirg.
Nga dosja hetimore mësohet se disa ditë para se të ndodhte krimi autori ka shkuar me një mjet në fshatin Zvirinë dhe para lokalit të xhaxhait të viktimës ka xhiruar gomat dhe është larguar.
Ditën e ngjarjes viktima së bashku me një shok kanë shkuar në fshatin Pirg për tu qethur në berberanë në afërsi të lokalit ku ndodhi vrasja. Ata kanë parë autorin duke kaluar me makinë dhe i kanë fishkëllyer me qëllim për tu sqaruar.
Ai ka ndaluar, ka dalë nga makina dhe kanë nisur në debatojnë ndërkohë që ka nxjerrë thikën. Viktima në këto kushte ka marrë një karrige nga oborri i lokalit për t’u vetëmbrojtur duke e vendosur përpara trupit por teksa bënte hapa pas është penguar dhe autori në atë moment e ka goditur me thikë. E gjithë ngjarja është filmuar nga kamerat e sigurisë së lokalit.