Kuvendi i Shqipërisë në faqen zyrtare në “Facebook” publikoi të mërkurën për disa minuta logon e fushatës së Partisë Socialiste, me numrin 5 dheme thirrjen për të votuar Edi Ramën në zgjedhjet parlamentare të 11 majit.
Sipas ligjit, Kuvendi i Shqipërisë e ka të ndaluar me ligj përfshirjen në fushatën zgjedhore, por kjo vijë e kuqe u harrua sot, të paktën për disa minuta, pasi më vonë logoja u hoq nga faqja zyrtare.
Pasi lajmi mori dhenë, ka reaguar edhe zyra e shtypit të Kuvendit, por pa sqaruar se pse një postim i tillë u publikua në faqen zyrtare të institucionit.
“Kuvendi i Shqipërisë garanton opinionin publik se administrata dhe shërbimet, faqja dhe rrjetet sociale të tij nuk janë përfshirë dhe nuk do të përfshihen në asnjë mënyrë dhe në asnjë formë në fushatën e zgjedhjeve parlamentare”, thotë Kuvendi, por fotoja e mëposhtme tregon të kundërtën.
Reagimi i Kuvendit:
Kuvendi i Shqipërisë është një institucion demokratik pluralist gjithëpërfshirës, përfaqësues i vullnetit të popullit dhe i të gjitha forcave politike.
Sqarojmë opinionin publik se shërbimet e Kuvendit, gjatë ushtrimit të detyrave të tyre, bazohen në parimet e profesionalizmit dhe paanshmërisë.
Kuvendi i Shqipërisë garanton opinionin publik se administrata dhe shërbimet, faqja dhe rrjetet sociale të tij nuk janë përfshirë dhe nuk do të përfshihen në asnjë mënyrë dhe në asnjë formë në fushatën e zgjedhjeve parlamentare.