Gjykata e Posaçme ka ndryshuar masën e sigurisë ndaj avokatit Arben Lena, i arrestuar në janar të këtij viti për korrupsion.
Ndaj kreut të Dhomës së Avokatisë në Korçë, është caktuar masa e arrestit në shtëpi, deri në përfundim të hetimeve, duke e liruar nga qelia.
Ai u arrestua me dyshimin se do të ndikonte në Gjykatën e Apelit të Korçës për lirimin e një të arrestuari për trafik klandestinësh teksa akuzohet se mori 5 mijë euro ryshfet.
Bashkë me të u arrestuan edhe 6 persona të tjerë. Nikolla Hafësllari, Nikolla Jesku, Blerand Kozici dhe Artiana Kozici në bashkëpunim me njëri-tjetrin, kanë dhënë përfitim të parregullt prej 5 000 Euro, me qëllim ushtrimin e ndikimit të paligjshëm tek gjyqtari i Gjykatës së Apelit Korçë për lehtësimin e pozitës procedurale të të pandehurit Blerand Kozici, i cili po hetohej nën efektin e masës së sigurimit “arrest në burg“, nga Prokuroria e Rrethit Gjyqësor Pogradec.
Dy të pandehurit e tjerë, Arben Lena dhe Dajana Kodra (Ninga), kanë marrë paratë duke premtuar se do të ushtronin ndikim të paligjshëm te gjyqtari i Gjykatës së Apelit Korçë, me qëllim lehtësimin e pozitës procedurale të të hetuarit Kozici.