Presidenti amerikan Donald Trump ka urdhëruar zhvendosjen e dy nëndetëseve bërthamore në rajone strategjike, si reagim ndaj deklaratave provokuese të ish-presidentit rus Dmitry Medvedev.
Trump tha se ky veprim është marrë për arsye sigurie dhe për të shmangur pasoja të padëshiruara që mund të vijnë nga retorika e ashpër. Ai nuk dha detaje mbi vendndodhjen e nëndetëseve, duke respektuar protokollet ushtarake të SHBA-së.
Deklaratat e Medvedev erdhën si kundërpërgjigje ndaj paralajmërimeve të Trump ndaj Moskës, që të pranojë një armëpushim në Ukrainë ose të përballet me sanksione të ashpra. Medvedev, aktualisht zëvendëskryetar i Këshillit të Sigurisë në Rusi, e ka akuzuar Trumpin për përdorimin e ultimatumeve ndaj Kremlinit, duke i cilësuar këto veprime si kërcënim të drejtpërdrejtë ndaj sigurisë.
Kremlini ende nuk ka reaguar zyrtarisht, por tregjet financiare në Moskë kanë shënuar rënie të ndjeshme pas njoftimeve nga Uashingtoni.
Tensionet mes Trump dhe Medvedev janë rritur ndjeshëm kohët e fundit, të shoqëruara me përplasje verbale dhe sulme personale në rrjetet sociale. Situata është përshkallëzuar më tej pasi Trump vendosi një afat të ri për presidentin aktual rus, Vladimir Putin, që të përfundojë luftën në Ukrainë deri më 8 gusht, një kërkesë që Moska nuk ka treguar gatishmëri ta përmbushë.
Medvedev, një mbështetës i hapur i luftës në Ukrainë, ka paralajmëruar për pasoja serioze në rast se Perëndimi vazhdon me atë që ai e quan “lojë me ultimatume”.