Skandaloze ajo që ka ndodhur në faqen zyrtare të Kuvendit të Shqipërisë, ku është publikuar logoja e fushatës së Partisë Socialiste, me numrin 5 dhe kërkesën për të votuar Edi Ramën.
Ky institucion e ka të ndaluar të bëjë fushatë elektorale, teksa ky postim tregon sërish sa pak serioz është bërë Kuvendi i Shqipërisë gjatë viteve të fundit, ku ligjet miratohen me porosi të kryeministrit, shumë herë edhe pa u diskutuar fare.
Por, publikimi i këtij postimi ngre dyshime të tjera. I njëjti postim është bërë edhe në faqen zyrtare të kryeministrit Edi Rama.
A është i njëjti person që administron faqen zyrtare të Kuvendit të Shqipërisë dhe atë të kryeministrit Edi Rama?
Nëse kjo është e vërtetë, ky është një tjetër skandal i madh, që tregon se Shqipëria qeveriset nga një person i vetëm, me institucionet e tjera që vetëm u binden urdhrave të tij, ashtu siç bëhej shumë vite më parë, në kohën e diktaturës.
Për këtë postim, që tashmë është fshirëduhet të mbajë përgjegjësi kryetarja Elisa Spiropali, e cila duhet të japë shpjegime se si Kuvendi mund të bëjë propagandë për partinë në pushtet.
