Ditën e djeshme, lajmi ku kryeministri Edi Rama “tallej” me një ngatërresë të presidentit amerikan ku ky i fundit tha se kishte arritur paqen mes Shqipërisë dhe Azerbajxhanit duke e ngatërruar vendin tonë me Armeninë, bëri xhiron e rrjetit.
Gjatë samitit të Komitetit Politik Europian të mbajtur në Kopenhagen të Danimarkës Rama u pa teksa bënte batuta me presidentin francez Emanuel Macron.
“Duhet të na kërkoni falje… sepse nuk na përgëzuat për marrëveshjen e paqes që Presidenti Trump bëri midis Shqipërisë dhe Azerbajxhanit,” -ishte kjo shprehja e Ramës drejtuar Macronit, ndërsa ky i fundit ia preu shkurt: “Më vjen keq për këtë”.
Këto pak sekonda mjaftuan që media ndërkombëtare të shkruanin se si Trump u bë objekt shakaje mes kryeministrit shqiptar, presidentit francez dhe presidentit të Azerbajxhanit.
Kjo e detyroi kryeministrin Edi Rama që të reagonte menjëherë duke thënë se ai thjesht po bënte humor dhe se si media mund ta shtrembërojë realitetin.
Ai nuk harron të lavdërojë edhe Trumpin, për të cilin thotë se “e ka treguar veten si një udhëheqës që e riktheu fjalën “paqe” në fjalorin e Perëndimit pas shumë vitesh”.
“Është vërtet e jashtëzakonshme se si funksionon media e sotme dhe si e ashtuquajtura “viralitet” mund ta shtrembërojë kaq lehtë realitetin.
Një fjali e thënë me humor të mirë, në frymën e miqësisë, papritmas shndërrohet në një kryefjalë botërore të një samiti të tërë midis dhjetëra kombeve, ndërsa gjithçka tjetër, substanca e vërtetë, bëhet e parëndësishme. Por po, ishte shumë argëtuese sot të isha me mikun tim të vjetër Ilham Aliyev dhe, në prani të mikut tonë të dashur të përbashkët Emmanuel Macron, t’i referohesha një gabimi të Presidentit Trump se edhe Shqipëria arriti të bënte paqe me Azerbajxhanin, ndërsa vetë Emmanuel punoi pa u lodhur, për një kohë të gjatë, për të sjellë paqe midis Azerbajxhanit dhe Armenisë. Një vërejtje e lehtë, një moment miqësor. Sigurisht, nuk ka problem nëse përhapet, por ta shtrembërosh atë në helm politik është thjesht e padrejtë.
Pra, le ta sqarojmë situatën: E vërteta është se Presidenti Trump e ka treguar veten si një udhëheqës që e riktheu fjalën “paqe” në fjalorin e Perëndimit pas shumë vitesh. Dhe po, në një kohë jashtëzakonisht të shkurtër, ai ka arritur paqe aty ku të tjerët u përpoqën por dështuan dhe ai vazhdon ta ndjekë atë pa u lodhur. Ai shkëmbim nuk ishte gjë tjetër veçse një moment humori të mirë midis njerëzve që, në fakt, janë ndër admiruesit më të mëdhenj të Presidentit Trump.” – shkruan Rama në X.