Kryeministri Edi Rama ka shpallur sot emrat e rinj të kabinetit qeveritar, ku ka konfirmuar në detyrë si zv.kryeministre dhe Ministre të Infrastrukturës dhe Energjisë, Belinda Ballukun, teksa nuk ka patur revolucion, por vetëm rokadë mes ministrash dhe shumë pak hyrje të reja.
Për herë të parë Ministrinë e Brendshme do ta drejtojë një grua, dhe këtë detyrë Rama ia ka besuar Albana Koçiut, që deri më sot mbante detyrën e Ministres së Shëndetësisë.
Në detyrë janë konfirmuar edhe Petrit Malaj si Ministër i Financave dhe Blendi Gonxhja si Ministër i Turizmit, Kulturës dhe Sportit, një ministri e re që do të formohet gjatë këtij mandati qeverisës. Ndërkohë, do të ketë një ministri të rëndësishme për Elisa Spiropalin, që merr drejtimin e Ministrisë së Jashtme.
Mirela Kumbaro do të drejtojë Ministrinë e Arsimit, ndërsa Sofjan Jaupaj do të jetë ministri i ri i Mjedisit, pasi shërbeu disa vite si zv.ministër. Delina Ibrahimaj do të jetë ministrja e re e Ekonomisë dhe Inovacionit, ndërsa hyrje e re nga jashtë politikës është Evis Sala, të cilës i besohet Ministria e Shëndetësisë.
Ministria e Bujqësisë i është besuar një emri të ri, Andis Sallës, i cili drejton aktualisht Bashkinë e Cërrikut.
Kabineti qeveritar “Rama 4”
Zv.kryeministër dhe Ministër i Infrastrukturës dhe Energjisë – Belinda Balluku
Ministër i Ekonomisë dhe Inovacionit – Delina Ibrahimaj
Ministër i Shtetit për Administratën Publike dhe Antikorrupsionin – Adea Pirdeni
Ministër për Evropën dhe Punët e Jashtme – Elisa Spiropali
Ministër i Mbrojtjes – Pirro Vengu
Ministër i Mjedisit – Sofjan Jaupaj
Ministër i Brendshëm – Albana Koçiu
Ministër i Financave – Petrit Malaj
Ministër i Drejtësisë – Besfort Lamallari
Ministër i Arsimit – Mirela Kumbaro
Ministër i Shëndetësisë dhe Mbrojtjes Sociale – Evis Sala
Ministër i Bujqësisë dhe Zhvillimit Rural – Andis Salla
Ministër i Shtetit për Marrëdhëniet me Parlamentin – Toni Gogu
Ministër Shteti dhe Kryenegociator – Majlinda Dhuka
Ministër i Turizmit, Kulturës dhe Sportit – Blendi Gonxhja
Ministër i Shtetit për Pushtetin Vendor – Ervin Demo
Ministria e Inteligjencës Artificiale për Prokurimet Publike – Diella