Kryetarët e partive të vogla opozitare kanë propozuar krijimin e Federatës së Opozitës, për të bashkuar të gjitha partitë me qëllim ndryshimin e realitetit politik në Shqipëri.
Kreu i Partisë Republikane, Fatmir Mediu, u shpreh në konferencën për media se opozita duhet të jetë e bashkuar, teksa ndër të tjera u ndal edhe te Reforma Zgjedhore.
“Opozita duhet të jetë e bashkuar, vetëm kështu mund të ndryshojë realitetin politik në Shqipëri. Shqipëria ka qenë vendi i të mundurave të habitshme. Të gjithë ata që duan të kontribuojnë në një qëndrim të përbashkët të opozitës padyshim i kemi parë si marrëdhënie racionale. I ngelet partive politike që të përcaktojnë qartë pozicionin e tyre në raport me qëndrimet. Partitë mund të funksionojnë edhe jashtë kësaj Federate, por shpresoj që të kenë një qëndrim të qartë që i shërben interesave të vendit dhe të opozitës”, tha Fatmir Mediu.
Për Agron Dukën, kryetarin e Partisë Agrare Ambientaliste, Sali Berisha dhe Lulzim Basha duhet t’i lënë mënjanë hallet individuale dhe të bahskohen për një qëllim të përbashkët.
“Iniciativë është e jona. Dhe Basha dhe Berisha i kanë dëgjuar propozimet tona. Kemi shpresë, se do i thërrasin arsyes dhe të lënë mënjanë hallet individuale dhe të bashkohen për një qëllim të përgjithshëm”, tha ndër të tjera Duka.