Padia e Lapajt/ Shehaj e ironizon duke nxjerrë prova të reja (VIDEO)

Kryetari i Partisë Mundësia, Agron Shehaj ka nxjerrë dokumente të tjera për kryetarin e ‘Shqipëria Bëhet’, Adriatik Lapaj dhe e ka ironizuar atë, pas padisë që ky i fundit depozitoi në Gjykatën e Posaçme për shpifje dhe fyerje.

Agron Shehaj nxorri në video vendimin e gjykatës së vjehrrit të Lapajt, Alltun Çela për një pronë në Ksamil, ku subjekti përfitues është mbrojtur në Apel nga Lapaj.

Me nota tallëse në profilin e tij në rrjetet sociale, Agron Shehaj thotë se tani luftën Adriatik Lapaj e ka në gjykatë, që t’i shpëtojë burgut dhe jo me Partinë Mundësia apo me Agron Shehajn.

Sipas Shehajt, lufta politike e Lapajt ka mbaruar dhe i ka dalë boja.

Agron Shehaj: Bela, na shpallën luftë. Si do ia bëjmë, ti do luftosh për mua apo do ikësh?

Bela: Do luftoj.

Agron Shehaj: Do luftosh? Çfarë ka shkruajtur këtu Bela

Bela: Alltun Çela

Agron Shehaj: Po këtu

Bela: Hajro Çini

Agron Shehaj: Këtu?

Bela: Në Ksamil, Sarandë.

Agron Shehaj: Prit tani këtu është vendimi i vjehrrit. Po këtu Bela çfarë ka shkruajtur?

Bela: Hajro Çini

Agron Shehaj: Po këtu

Bela: Ksamil, Sarandë

Agron Shehaj: Po këtu

Bela: Adriatik Lapaj.

Agron Shehaj: Luftën Lapaj e ka në gjykatë të shpëtojë nga burgu më duket, nuk e ka me ne, lufta politike mbaroi, i doli boja.

Kreu i ‘Mundësia’ theksoi se Lapaj duhet të mos i fshihet përballjes në publik për aferat me pronat.

Kur dorëzoi kallëzimin në Gjykatën e Posaçme, Adriatik Lapaj u shpreh se nuk kërkonte përplasje me Shehajn, por akuzat e tij meritonin një përgjigje.