Organizata Botërore e Shëndetësisë (OBSH) ka shpallur shpërthimin e Ebola-s në Republikën Demokratike të Kongos dhe Ugandë si emergjencë të shëndetit publik me shqetësim ndërkombëtar, pasi të paktën 80 persona dyshohet se kanë humbur jetën nga virusi.
Sipas OBSH-së, shpërthimi është shkaktuar nga virusi Bundibugyo dhe, megjithëse nuk i plotëson kriteret për t’u cilësuar pandemi globale, ekziston rrezik i lartë që sëmundja të përhapet edhe në vendet fqinje që ndajnë kufij tokësorë me Kongon.
Agjencia shëndetësore e OKB-së bëri të ditur se deri të shtunën janë raportuar 80 viktima të dyshuara, tetë raste të konfirmuara në laborator dhe 246 raste të dyshuara në provincën Ituri të Kongos, në të paktën tre zona shëndetësore, përfshirë Bunia, Rwampara dhe Mongbwalu.
Një rast është konfirmuar edhe në qytetin lindor të Gomës, sipas një deklarate të rebelëve të M23.
Mediat amerikane raportojnë se të paktën gjashtë shtetas amerikanë në Kongon Lindore janë ekspozuar ndaj virusit Ebola, ndërsa tre prej rasteve konsiderohen me rrezik të lartë. STAT News raportoi se një amerikan mund të ketë shfaqur simptoma të sëmundjes, megjithëse Reuters nuk ka mundur t’i verifikojë në mënyrë të pavarur këto informacione.
Sipas raportimeve, qeveria amerikane po punon për largimin e personave të ekspozuar nga territori i Kongos, me mundësinë e transferimit të tyre në një bazë ushtarake në Gjermani.
Ndërkohë, Qendrat Amerikane për Kontrollin dhe Parandalimin e Sëmundjeve (CDC) kanë aktivizuar qendrën e reagimit emergjent për shpërthimin dhe planifikojnë të dërgojnë staf shtesë në zyrat e tyre në Kongo dhe Ugandë.
Ambasada e SHBA-së në Kongon Demokratike lëshoi gjithashtu një alarm shëndetësor për qytetarët amerikanë, duke rikujtuar se Departamenti i Shtetit këshillon të shmanget udhëtimi drejt provincës Ituri, pasi qeveria amerikane ka “mundësi jashtëzakonisht të kufizuara” për të ofruar ndihmë emergjente në atë zonë.