Arrestimi i Erion Veliajt tregoi përfundimisht se Bashkia e Tiranës prej vitesh ka qenë institucioni më i kriminalizuar në vendin tonë.
Prangosja e kryetarit nxori në pah nivelin e korrupsionit që bëhej në zyrat e atij institucioni, që fillonte nga “koka” e vazhdonte te çdo drejtor apo punonjës që kishte sadopak pushtet.
Grabitja e madhe e miliona eurove të taksapaguesve nisi me aferën e inceneratorit, ku vijojnë të jepen milionat pavarësisht se impiant nuk ka, ndërkohë që SPAK e ka vënë nën sekuestro dhe ka dënuar disa zyrtarë të përfshirë në këtë aferë.
Ndërkohë, nën hetim për inceneratorin duket të jetë edhe Veliaj, pavarësisht se Prokuroria e Posaçme nuk ka dhënë asnjë detaj në lidhje me këtë çështje.
Pas inceneratorit, do të dilte skandali “5D” ku të përfshirë ishin disa drejtorë në Bashkinë e Tiranës, njerëz shumë të besuar të Erion Veliajt. Nëpërmjet një skeme korruptive, këta drejtorë tenderat i çonin te kompania e tyre, duke arritur të përfitojnë miliona euro të taksapaguesve.
Sot, ata janë prapa hekurave, në pritje edhe të kryetarit të tyre, i cili do t’u bashkohet dhe do të formojnë sërish një “minibashki në qeli”.
Qershia mbi tortë do të ishte dosja e SPAK për Veliajn, ku Prokuroria e Posaçme zbardhi të gjitha rastet e korrupsionit dhe pastrimit të parave të Veliajt dhe bashkëshortes së tij, Ajola Xoxës.
Kjo e fundit, falë parave të grabitura me bashkëshortin, dehej në luksin e bizhuterive dhe veshjeve të shtrenjta, aq sa vetëm në 4 vitet e fundit, kishte blerë online mbi 860 mijë euro sende dhe veshje.
Madje, sipas gazetares Klodiana Lala, vetëm një fustan i kishte kushtuar 35 mijë euro. Këtë shumë, një pensionit e merr në 10 vite jetë.
Kushedi sa miliona euro të tjera do të jenë shpenzuar në pagesa cash apo me karta të të tretëve, për të përmbushur dëshirat luksoze të çiftit Veliaj-Xoxa, që sot në sytë e qytetarëve shihen vetëm si hajdutë të rëndomtë.
Nga dje, në Bashkinë e Tiranës do të jetë e vështirë të vidhet sërish, pasi të gjithë kanë kuptuar se me SPAK nuk bëhet shaka.