Kreu i Partisë Demokratike, Sali Berisha ka folur në lidhje me hakerimin në kompjuterat e SPAK. Berisha tha se ngjarja, i kujton kohën kur, sipas tij, dosjet kalonin fillimisht në Partinë Socialiste përpara se të mbërrinin në gjykatë.
Gjatë një konference për mediat, Berisha tha se këtë ndërhyrje në emailet e prokurorëve të SPAK dua t’ia faturojnë Fatmir Xhafajt duke folur për një luftë të brendshme brenda PS-së.
“Po i vijnë rrotull dhe po e akuzojnë se ka hakëruar kompjuterët e SPAK, për të më revoltuar edhe mua dosjen time, atë i them Fatmirit, publikojeni sa ta gjeni sepse është publike”– tha Berisha.
Ndërkohë theksoi se qytetarët janë gjithnjë e më shumë të vetëdijshëm për kontrollin që Edi Rama ka mbi sistemin e drejtësisë
“Së pari, më duhet të them se u kthye koha kur dosjet, para se të shkonin në gjykatë, shkonin në Partinë Socialiste. Para shumë vitesh, dosja para se të shkonte në gjykatë, shkonte në PS. Tani hakerohet. A është hakerim, apo vetë hakerim, unë nuk e di, por është gjë shumë, shumë e rëndë.
Dmth, o qytetarë të gjitha të dhënat tuaja, merren, vidhen, manipulohen dhe nuk kanë asnjë siguri. Çfarë është kjo? Është kjo mundet dhe një luftë e brendshme, brenda klaneve mafioze brenda PS. Tani grupi armiqësor, Xhafa, Pastori, Bushka, dhe 2-3 të tjerë, ata duhet të akuzohen me çdo kusht. Më shëmbëllen si historia e statuseve të Erion Veliajt. Statuset ia shkruante Rama dhe përgjigjen SKAP-i ia jepte Erion Veliajt.
Edhe këtë hakerimin, duan të ja faturojnë Fatmir Xhafajt, e kuptoj unë, aty e ke hallin ti. Ato janë hakeruar apo vetë hakeruar këtë nuk e marrim vesh ne. Ato po përdoren, siç u përdorën statuset. Meqenëse filluan të thonë, po merren me fustanet e Ajolës, tani ja sajdisën statuset dhe i thanë, tani ke kryer krim të madh shumë.
Tani edhe Fatmirit po i vijnë rrotull dhe po e akuzojnë se, gossipi është fjala, se ka hakeruar kompjuterat e SKAP-it, dhe për të më revoltuar dhe mua, edhe dosjen time. Atë i them Fatmiri publikojeni sa ta gjeni, se është publike. Shumë operacion i dyshimtë, të jemi të sinqertë, i dyshimtë aq sa ishin statuset në Facebook të Erion Veliajt. Ta ndjekin. Një gjë mund të ju them, që qytetarët po kuptojnë çdo ditë e më shumë kontrollin fatal të drejtësisë nga Edi Rama, kjo është e vërtetë dhe për ne kjo ka rëndësi”- tha Berisha.