NATO deklaroi se është e gatshme të mbrojë çdo centimetër të territorit të vendeve aleate, duke dënuar njëkohësisht sjelljen e papërgjegjshme të Rusisë, pasi një dron rus goditi gjatë natës një pallat banimi në lindje të Rumanisë.
Sekretari i Përgjithshëm i NATO-s, Mark Rutte, zhvilloi një bisedë telefonike me presidentin rumun Nicușor Dan, për të shprehur solidaritetin e plotë të aleancës dhe mbështetjen për personat e plagosur nga sulmi.
“NATO është e gatshme të mbrojë çdo centimetër të territorit aleat. Ne do të vazhdojmë të forcojmë gatishmërinë tonë për të parandaluar dhe mbrojtur ndaj çdo kërcënimi, përfshirë dronët. Sjellja e papërgjegjshme e Rusisë është një rrezik për të gjithë ne”, deklaroi Rutte.
Ai shtoi se Moska po vazhdon sulmet ndaj civilëve dhe infrastrukturës civile në Ukrainë, duke theksuar se pasojat e luftës nuk ndalen në kufirin ukrainas.
“Lufta e Rusisë duhet të marrë fund, po ashtu edhe shpërfillja e saj ndaj sigurisë së civilëve”, tha kreu i NATO-s, duke nënvizuar se aleanca do të vazhdojë të forcojë mbrojtjen dhe mbështetjen për Kievin.
Edhe zëdhënësja e NATO-s, Allison Hart, dënoi “papërgjegjshmërinë” e Rusisë dhe konfirmoi kontaktet e vazhdueshme të aleancës me autoritetet rumune.
Ngjarja ndodhi në orët e para të 29 majit, kur një dron goditi çatinë e një pallati 10-katësh në qytetin Galați, pranë kufirit të Rumanisë me Ukrainën, duke shkaktuar shpërthim dhe zjarr. Dy persona mbetën të plagosur.
Ministria rumune e Mbrojtjes bëri të ditur se droni, i identifikuar si model rus Geran-2, ishte gjurmuar nga radarët përpara se të rrëzohej.
Ministrja e Jashtme e Rumanisë, Oana Toiu, e cilësoi incidentin si një shkelje serioze të së drejtës ndërkombëtare dhe njoftoi se ambasadori rus ishte thirrur për sqarime. Bukureshti ka kërkuar gjithashtu përshpejtimin e furnizimeve me sisteme kundër dronëve.
Presidentja e Komisionit Europian, Ursula von der Leyen, deklaroi se lufta e Rusisë “ka kaluar edhe një vijë tjetër të kuqe”, duke shprehur solidaritet me Rumaninë.
Incidenti vjen vetëm pak ditë pasi një dron ukrainas hyri aksidentalisht në hapësirën ajrore të Estonisë, ndërsa Letonia dhe Lituania kanë lëshuar paralajmërime për inkursione të mundshme. Rumania ka raportuar 28 shkelje të hapësirës së saj ajrore që nga nisja e pushtimit rus të Ukrainës në vitin 2022.