Gjykata e Posaçme ka urdhëruar SPAK që të nisë hetimet ndaj deputetes së Partisë Socialiste, Olta Xhaçka dhe bashkëshortit të saj, Artan Gaçi, me këtë të fundit të shpallur investitor strategjik nga qeveria.
GJKKO ka pranuar ankimimin e eurodeputetit Fredi Beleri dhe urdhëron SPAK që të regjistrojë kallëzimin penal për akuzat e shpërdorimit të detyrës, falsifikimit të dokumenteve dhe pastrimit të produkteve të veprës penale të kryer në bashkëpunim.
Beleri në kallëzimin e tij kishte kërkuar shfuqizimin e vendimit të Prokurorisë së Posaçme për Korrupsionin dhe Krimin e Organizuar (SPAK), që kishte vendosur të mos fillojë procedimin penal ndaj Olta Xhaçkës dhe Artan Gaçit lidhur me tjetërsimin e pronave në Himarë, ku bashkëshorti i ish-ministres do të bënte një investim luksoz, por toka tashmë është e sekuestruar me urdhër të SPAK.
Në padinë e Belerit, thuhet se Olta Xhaçka me mosveprimet e saj, duke mosdeklaruar konfliktin e interesit, ka përfituar nëpërmjet regjimit martesor të drejta pasurore dhe përfitime të paligjshme, që sipas ligjit për investitorët strategjikë si dhe ligjin për konfliktin e interesit nuk i takojnë. Xhaçka nëpërmjet investimit strategjik në një pronë të falsifikuar, ka përfituar të drejtën e përdorimit falas të pasurive shtetërore për të cilën shtetas të zakonshëm paguajnë detyrimet tatimore.
Bashkëshorti i Xhaçkës, të cilën kryeministri Edi Rama e ka futur sërish në listën e kandidatëve për deputetë për zgjedhjet e 11 Majit përfitoi 10 mijë m2 tokë përmes falsifikimit të dokumenteve, për të ndërtuar resortin “Dreamades Luxury Suites”.
Në ndihmë i ka ardhur edhe ish-kryebashkiaku i Himarës, Jorgo Goro, i cili u dënua me 3 vite e 1 muaj burg nga GJKKO lidhur me këtë çështje.
Partia Demokratike kërkoi që t’i hiqej mandati Olta Xhaçkës, për shkak se bashkëshorti i saj ka përfituar pasuri publike me shpalljen si investitor strategjik nga Komiteti i drejtuar prej kryeministrit Edi Rama. Por socialistët e morën në mbrojtje Xhaçkën.
Mazhoranca socialiste në shtator të 2024-ës rrëzoi për herë të dytë një vendim të Gjykatës Kushtetuese që e detyronte Kuvendin të dërgonte për interpretim mandatin e deputetes Olta Xhaçka.
Por si e tjetërsoi Artan Gaçi tokën në Gjilekë, ku më pas fitoi edhe statusin e investitorit strategjik?
Sipas padisë, trashëgimtarët e shtetasit Foto Mëhilli kishin trashëgimi 1000 metër tokë, por duke tjetërsuar një pasuri që rrjedh nga një vepër penale si ajo e falsifikimit, e kanë shtuar tokën e tyre edhe me 4500 metra të tjerë në Gjilekë dhe ia kanë shitur Artan Gaçit.
Gjithçka është bërë edhe me nënshkrimin e ish-kryebashkiakut Jorgo Goro, i cili ka konfirmuar duke nënshkruar planvendosjen e ngastrës 36/36/1 pa marrë fare parasysh konfigurimin e saj në hartë në raport me kufijtë e shënuar në AMTP dhe pa e verifikuar në raport me ngastrën që i përputhej kësaj pasurie në hartën kadastrale 1:5000 mbi bazën e të cilës është kryer ndarja e tokës bujqësore në kooperativën Gjilek-Dhërmi.
Pas të gjitha këtyre veprimeve të kundraligjshme, Artan Gaçi mundi të përfitonte statusin e investitorit strategjik. Ndërkohë, në kundërshtim me ligjin është edhe Olta Xhaçka, pasi Gaçi e ka përfituar statusin në kohën kur ajo ishte Ministre e Jashtme.