Hungaria ka bllokuar sërish përparimin e procesit të anëtarësimit të Ukrainës në Bashkimin Evropian, duke e lidhur hapin e mëtejshëm me garancitë për mbrojtjen e të drejtave të pakicës hungareze në Ukrainë.
Në një takim të Grupit të Punës të Këshillit për Zgjerimin dhe Vendet që Negociojnë Anëtarësimin në BE (COELA), të zhvilluar të martën, përfaqësuesi i Hungarisë konfirmoi veton e vendosur javën e kaluar për hapjen e një kapitulli të ri negociues me Ukrainën, që lidhet me tregun e brendshëm dhe politikën e konkurrencës.
Hungaria kundërshtoi hapjen e këtij kapitulli, pavarësisht mbështetjes së një numri të madh shtetesh anëtare dhe të Komisionit Evropian.
Ndërkohë, Budapesti nuk e shtriu veton ndaj Moldavisë, procesi i anëtarësimit të së cilës po zhvillohet paralelisht me atë të Ukrainës. Kjo i hapi rrugë Moldavisë për avancimin e kapitullit të tretë të negociatave. Megjithatë, disa shtete anëtare kundërshtojnë ndarjen e dy proceseve, pasi rrugët e anëtarësimit të Ukrainës dhe Moldavisë mbeten formalisht të lidhura.
Të drejtat e pakicës hungareze, kusht për Ukrainën
Budapesti e ka kushtëzuar përparimin e Ukrainës drejt anëtarësimit në BE me zbatimin e garancive të premtuara për të drejtat e pakicës hungareze në Ukrainë. Kjo qëndrim u bë i qartë javën e kaluar, kur Hungaria bllokoi hapjen e dy kapitujve të rinj të negociatave.
Gjatë verës, zyrtarët hungarezë dhe ukrainas zhvilluan bisedime për të drejtat e komunitetit hungarishtfolës. Në kuadër të tyre, Kievi u angazhua të garantonte të drejtat arsimore, kulturore dhe gjuhësore të kësaj pakice.
Tashmë, Budapesti kërkon që këto angazhime të zbatohen konkretisht.
Në një deklaratë të hënën, ministrja e Jashtme hungareze, Anita Orbán, tha se ishte bërë përparim në këtë drejtim dhe se kishte nisur puna për hartimin e legjislacionit të ri për arsimin.
Më herët, Hungaria kishte miratuar hapjen e dy kapitujve negociues me Ukrainën, që lidhen me të drejtat themelore dhe marrëdhëniet me jashtë.
Qëndrimi i Budapestit tregon një ndryshim në qasjen ndaj ambicieve të Ukrainës për anëtarësim në BE. Ndërsa qeveria e mëparshme e Viktor Orbánit bllokonte kategorikisht çdo përparim të Kievit drejt anëtarësimit, qeveria e re e drejtuar nga Péter Magyar ka treguar më shumë fleksibilitet, megjithëse vazhdon të kundërshtojë një anëtarësim të përshpejtuar të Ukrainës.