Kryeministri Edi Rama i është përgjigjur sot kreut të PD, Sali Berisha, i cili një ditë më parë tha se PS u kishte kopjuar programin.
Gjatë rubrikës “Sy m’sy” në Facebook, Rama u shpreh se kjo është qesharake, a thua se bëhet fjalë për ndonjë kod kasaforte apo se u kopjua Kodi i Da Vinçit.
“Qajnë hallin pensionistëve. Qajnë hallin edhe se u kopjua programi. Është gjëja më qesharake, a thua se bëhet fjalë për ndonjë kod atomik, apo kod kasaforte të ndonjë sekreti. U kopjua kodi i Da Vinçit. Megjithëse iu qajnë hallin pensionistëve, nuk japin kontributin e tyre për Fondin e Sigurimeve Shoqërore, deri këtu është niveli i banaliteti dhe hipokrizisë dhe krijesave kënetore”, u shpreh Rama.
Gjatë bashkëbisedimit me ndjekësit e tij në, Rama u shpreh se PS ka një program që do të integrojë Shqipërinë në Bashkimin Europian.
“Ndërkohë që e vërtetë është shumë më ndryshe, që nga fakti që vonesa apo kohëzgjatja e negociatave nuk është diçka që lidhet me mua dhe qeverinë tonë thjeshtë. Përcaktojnë edhe këtë si një mëkat të Rilindjes, por është një fakt që shikohet fare kollaj. Ne kemi një program me të cilin do të anëtarësojmë Shqipërinë në BE”, tha kreu i qeverisë.