Prokuroria e Vlorës ka sekuestruar 30 pasuri në Himarë, në pronësi të shtetasve J.J dhe J.K, që dyshohet se është përfituar nëpërmjet dokumenteve të falsifikuara.
Gjatë hetimeve të Prokurorisë, u evidentua se dokumenti kryesor që ka shërbyer për regjistrimin dhe përvetësimin e këtyre pronave me vlerë rreth 35 milionë euro në Gjykatën e Apelit Vlorë, ka rezultuar i falsifikuar.
Ndërkohë shtetasve që iu sekuestruan pasuritë, J.J. dhe K.J. janë nën hetim për veprat penale ‘Falsifikimi i Dokumenteve’ e kryer më shumë se një herë dhe ‘Pastrimi i produkteve të veprës penale ose veprimtarisë kriminale’.
Në total janë 247 mijë metra katrorë që janë përfituar përmes falsifikimit, të cilat janë vënë nën sekuestro.
Njoftimi:
Prokuroria pranë Gjykatës së Shkallës së Parë të Juridiksionit të Përgjithshëm, Vlorë sekuestroi 30 pasuri në Himarë të regjistruara në emër të shtetasve J.J. dhe K.J. nën hetim për veprat penale ‘Falsifikimi i Dokumenteve’ e kryer më shumë se një herë dhe ‘Pastrimi i produkteve të veprës penale ose veprimtarisë kriminale’.
Në kuadër të procedimit penal nr.51 të vitit 2021, Prokuroria pranë Gjykatës së Shkallës së Parë të Juridiksionit të Përgjithshëm Vlorë, konstatoi gjatë hetimeve, se pronat, në total 247.000 metra katrorë në Himarë, me një vlerë rreth 35 milionë euro, janë përfituar nga personat e mësipërm nëpërmjet dokumente të falsifikuara.
Gjatë hetimeve, Prokuroria arriti të provojë se dokumenti kryesor që ka shërbyer për regjistrimin dhe përvetësimin e këtyre pronave në Gjykatën e Apelit Vlorë, ka rezultuar i falsifikuar.
Për rrjedhojë, me kërkesë së prokurorisë, gjykata vendosi sekuestro preventive të 30 pronave në Zonën Kadastrale 1592 në Himarë.