Një bos shqiptar i krimit që përmbyti Britaninë e Madhe me kokainë mund të lirohet vite më herët në bazë të një marrëveshjeje transferimi për të lehtësuar krizën e mbipopullimit të burgjeve.
Erald Mema, 39 vjeç, i cili u dënua me 25 vjet burg, do të vuajë më pak se gjysmën e dënimit pasi do të transferohet në një burg shqiptar.
The Telegraph shkruan se ai është një nga gati 40 kriminelët më të rrezikshëm të Shqipërisë, të dënuar në MB dhe të zgjedhur për të vuajtur pjesën tjetër të dënimit në vendin e tyre, sipas një marrëveshjeje në të cilën Britania e Madhe po i paguan Shqipërisë më shumë se 4 milionë funte për t’i rikthyer ata.
Mema u dënua në Gjykatën e Kurorës së Oksfordit në vitin 2018 për kontrabandë kokaine me vlerë miliona paund në Mbretërinë e Bashkuar si bos i një grupi të krimit të organizuar për të cilin gjyqtari tha se “përfitoi masivisht nga ai që ishte një operacion i madh droge”.
Ai u transferua në një burg të sigurisë së lartë në Shqipëri sipas një marrëveshjeje të krijuar për të trajtuar mbipopullimin e burgjeve duke lejuar deri në 200 nga kriminelët më të këqij të Shqipërisë, përfshirë vrasës, përdhunues dhe baronë të drogës, të përfundonin dënimet e tyre në vend.
Sipas marrëveshjes, dënimet e dhëna për kriminelët në Mbretërinë e Bashkuar duhet të përputhen me politikën penale shqiptare, e cila mbart vetëm një dënim maksimal prej 15 vitesh burg për tregtarët e drogës si Mema.
Nëse do të kishte mbetur në Britani, do të lirohej në gjysmë të dënimit 25-vjeçar.
Megjithatë, transferimi i tij do të thotë se ai mund të shërbejë vetëm 10 vjet nëse ekuivalenti shqiptar i bordit të lirimit me kusht i jep atij lirinë, sipas avokatit të tij.
Në Shqipëri, të burgosurit mund të përdorin dhomat deri në katër orë në muaj për të kaluar kohë me partnerët e tyre, ndryshe nga MB ku vizitat bashkëshortore nuk lejohen.
Rregullat thonë: “Ambjente të tilla duhet të kenë krevate dhe çarçafë të cilët duhet të ndërrohen në fund të çdo takimi.
“Vizitat e zgjatura lejohen për të dënuarin që është i martuar ose bashkëjeton sipas Kodit të Familjes, pasi bashkëshortja të jetë kontrolluar nga policia.”
Përparësitë e tjera përfshijnë paketa javore me ushqime dhe rroba nga anëtarët e familjes, ambiente personale gatimi dhe leje deri në shtatë ditë për sjellje të mirë.
Skema e ‘kursimit të parave’
Skema e transferimit me Shqipërinë u lançua për të reduktuar numrin e të burgosurve të huaj në Mbretërinë e Bashkuar, si pjesë e masave për të trajtuar krizën e mbipopullimit mes frikës se burgjeve mund t’i mbarojë hapësira.
Më shumë se 10,000 shtetas të huaj – një në tetë nga totali – mbahen aktualisht në burgjet në Angli dhe Uells, me shqiptarët që përbëjnë kontigjentin më të madh me 1,323 të burgosur aktualisht.
Qeveria e Mbretërisë së Bashkuar i jep Shqipërisë 5 milionë euro (4.3 milionë £) për të paguar për rinovimin e burgjeve, sigurinë shtesë, punëtoritë, pajisjet rehabilituese dhe trajnimin e rojeve.
Kjo vjen mbi 36,50 euro në ditë për të burgosur për të gjithë kohëzgjatjen e dënimit të tyre, të cilat Ministria e Drejtësisë vlerëson se do të kushtojë 4 milionë paund në vit nëse transferohen të 200 të burgosurit më të rrezikshëm shqiptarë.
Ministria thotë se marrëveshja do të kursejë paratë e taksapaguesve sepse kushton gati 40,000 £ në vit për të strehuar një të burgosur në Angli dhe Uells.
Masa është pjesë e një përpjekjeje më të gjerë për të dëbuar shqiptarët e burgosur për krime në MB.
Sipas një marrëveshjeje të veçantë, kriminelët shqiptarë do të lirohen gjithashtu deri në një vit më herët dhe do t’u jepen grante prej 1500 £ për risistemim nëse pranojnë të deportohen dhe të mos kthehen më në MB.