Është mbajtur këtë të enjte seanca e parë për dosjen “5D” ku në pranga kanë përfunduar disa ish-drejtorë të Bashkisë së Tiranës, Redi Molla, Taulant Tushe dhe Mariglen Qato.
Në seancë nuk është pranuar kërkesa e të pandehurve për gjykim të shkurtuar ndërsa SPAK kërkoi kohë për të përgatitur listën e dëshmitarëve dhe parashtrimin e provave penale. Ndërkohë seanca e radhës do të mbahet më datë 17 Prill.
Në shkurt, SPAK mbylli hetimet dhe kaloi për gjykim dosjen ndaj drejtorëve dhe ish-zyrtarëve të të Bashkisë.
Ish-drejtorët, Redi Molla dhe Mariglen Qato do të gjykohen në këtë proces për tre vepra penale, përkatësisht për korrupsion pasiv, mosdeklarim pasurie dhe pastrim parash. Kurse Taulant Tushe, Nestor Muhametllari, Albano Janku, Julian Zanaj dhe Enton Punavia do të gjykohen për shkelje të barazisë në tendera.
Ish-zyrtarët e Bashkisë teksa mbanin pozicionin e drejtuesit të Ujësjellësit Kanalizimeve në Bashkinë e Tiranës apo të IMT kanë qenë pronarë de facto të shoqërisë “5D Construction Shpk”. Nga hetimet ka rezultuar që nga viti 2016 deri në vitin 2020 kjo kompani ka përfituar 12 tendera nga UKT, pra pjesë e Bashkisë së Tiranës, Tirana Parking dhe Klubi Sportiv SHA.