Seanca gjyqësore për ish-kryeministrin Sali Berisha vijon të jetë në ngërç, edhe pasi Gjykata vendosi dy avokatë të shtetit për të mbrojtur kreun e “Rithemelimit”.
Në njoftimin e fundit, GJKKO bën me dije se avokatet Jalldiz Kastrato dhe Rabije Cenalia nuk kanë pranuar të marrin përsipër mbrojtjen e Berishës, ndaj gjykata caktoi si avokate kryesisht Valentina Todoreskun, e cila do të marrë kohën e nevojshme për t’u njohur me dosjen.
Gjithashtu gjykata vendosi të lërë në fuqi masën e sigurisë “detyrim paraqitje” për ish-kryeministrin, masë të cilën Berisha refuzon ta pranojë.
Njoftimi i Gjykatës
Njoftim
– Në datën 26.10.2023, ora 15.00, në Gjykatën e Posaçme të Shkallës së Parë për Korrupsionin dhe Krimin e Organizuar, u riçel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt “Marrjen në pyetje të shtetasit nën hetim Sali Berisha”.
– Të pranishëm në sallën e gjykimit ishin prokurorët Arben Kraja dhe Enkeleda Millona, ndërsa i hetuari Sali Berisha u përfaqësua nga mbrojtësit e caktuar kryesisht nga gjykata, av.Rabije Cenalia dhe av.Jalldiz Kastrati.
– Gjykata bëri me dije se pranë kryesekretarisë së kësaj gjykate, ditën e sotme, datë 26.10.2023, ora 09.45, është depozituar një kërkesë nga shtetasi Sali Berisha, me objekt përjashtimin e gjyqtares nga gjykimi i kësaj çështje. Mbi këtë kërkesë, me vendimin nr.430 Akti, datë 26.10.2023 të GJKKO është vendosur mospranimi i kërkesës së kërkuesit Sali Berisha, me objekt përjashtimin e gjyqtares Irena Gjoka, si të pabazuar në prova dhe në ligj.
– Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha.