Marco Rubio pritet të shërbejë njëkohësisht si sekretar i Shtetit dhe këshilltar për Sigurinë Kombëtare për një periudhë minimale prej gjashtë muajsh dhe sipas tre zyrtarëve të lartë të Shtëpisë së Bardhë, ekziston interes i madh brenda administratës së presidentit Donald Trump që kjo skemë të bëhet e përhershme.
Sipas njërit prej zyrtarëve, ky rol i dyfishtë nuk është menduar si zgjidhje e përkohshme: “Nuk u krijua si një masë e përkohshme apo zëvendësuese”.
Rubio nuk e kishte kërkuar vetë këtë pozicion, por iu kërkua nga presidenti Trump dhe shefja e stafit, Susie Wiles, që të merrte kontroll më të gjerë mbi politikën e jashtme të administratës.
Kjo është një ngritje e jashtëzakonshme për një ish-rival në zgjedhjet paraprake të vitit 2016, me të cilin Trump shkëmbeu akuza personale gjatë garës për drejtimin e Partisë Republikane. Rubio, shpeshherë i parë me dyshim nga disa mbështetës të linjës së ashpër “MAGA”, po shihet tani si një figurë kyçe në ekipin e Trump.
“Rubio është shembull i një lojtari të vërtetë ekipi, i gatshëm të marrë çdo detyrë për të realizuar vizionin e presidentit – madje edhe ato më të vështirat apo me rrezik të lartë,” tha një zyrtar i Shtëpisë së Bardhë.
Sipas burimeve, mandati i tij është të sjellë stabilitet dhe të “riformatojë” Këshillin e Sigurisë Kombëtare, në mënyrë që produkti i tij të reflektojë plotësisht vizionin e presidentit. “Rubio është personi ideal për këtë rol, ai kupton procesin, njeh politikën e jashtme dhe bashkëpunon mirë me ekipin,” shtoi një tjetër zyrtar.
Një nga pikat e forta të Rubios, sipas Shtëpisë së Bardhë, është besnikëria ndaj presidentit. Ai ka braktisur shumë nga qëndrimet e tij të mëparshme – përfshirë edhe mbështetjen e ashpër për Ukrainën – që nga momenti kur u emërua diplomati kryesor i administratës. Po ashtu, ai ka mbështetur me forcë politikat e debatueshme të Trump për deportimet, ndonëse vetë është bir emigrantësh kubanë.
“Presidenti ka nevojë për një bashkëpunëtor të ndershëm dhe të përqendruar, jo për dikë që kërkon të ndërtojë një perandori apo të shtyjë agjendën e vet personale. Rubio është i përqendruar vetëm në realizimin e objektivave të presidentit,” tha një tjetër zyrtar.
Në fillim kishte shqetësime për ngarkesën dhe përmasën e një roli të dyfishtë. Historikisht, i vetmi person që ka mbajtur të dy pozitat ishte Henry Kissinger gjatë administratave Nixon dhe Ford, i cili e përdori këtë për të rritur ndjeshëm ndikimin e tij në vendimmarrje.
Por, teksa diskutimet për këtë model intensifikoheshin brenda stafit të Trump, u shfaq një perceptim i ri pozitiv për sinergjinë mes të dyja roleve:
“Njëra është mbledhëse e informacionit dhe formuluese e politikave, tjetra është udhëheqëse në fushën diplomatike. Realisht, mund të jenë më komplementare nga sa e mendoja,” tha një zyrtar.
Sa i përket kandidatëve të tjerë të mundshëm: “Të gjithë duhet të ndalojnë. Kemi një njeri të jashtëzakonshëm që është i gatshëm të bëjë këtë punë.”