Pas sulmeve publike që bëri në adresë të prokurores së Shkodrës Elsa Gjeli për ndërtimet pa leje në Theth, kryeministri Edi Rama ka shigjetuar një tjerër emër të sistemit të drejtësisë.
Bëhet fjalë për gjyqtarin Hazbi Balliun, i cili sipas Ramës, pallatin e konfiskuar në mes të Tiranës e kaloi në favor të ndërtuesit të paligjshëm.
Ai theksoi se dy emrat e mësipërm nuk janë të vetmit në sistemin e drejtësisë, që po mbajnë gjallë forcën e vjetër brutale të Antiligjit dhe antishtetit, në dëm të interesave publike.
Më tej, Rama thotë se mandati që i dhanë shqiptarët më 11 maj nuk duhet shpërdoruar, ndërsa shton se qeveria nuk do të çojë duart lart përballë sjelljeve të tilla të gjyqtarëve dhe prokurorëve, që sulmojnë republikën dhe interesat e qytetarëve të saj.
Ai në fund jep një mesazh paralajmërues duke thënë se “drejtësia vonon, por nuk harron”.
Reagimi i kryeministrit Rama:
Pas prokurores Gjeli, e cila e konsideroi krimin e ndërtimit të një fshati të tërë turistik pa leje në zemër të Thethit, si një zhvillim të natyrës dhe as nuk hapi fare hetime, duke u vendosur hapur në llogoren e Antiligjit e të Antishtetit kundër interesave të Republikës së Shqipërisë, dje u shfaq në të njëjtën llogore gjykatësi Balliu, i cili një pallat të tërë pa leje të konfiskuar nga shteti në mes të Tiranë dhe të vendosur në funksion të Agjencisë Shtetërore të Kadastrës, e konsideroi si pronë legjitime të ndërtimtarëve të paligjshëm, duke vendosur masë sigurie në favor të tyre
Fatkeqësisht as Gjeli as Balliu, nuk janë të vetmit prokurorë e gjykatës që po mbajnë gjallë në sistemin tonë të drejtësisë forcën e vjetër brutale të Antiligjit e të Antishtetit në dëm të interesave të shtetit, të komunitetit e të njerëzve të zakonshëm të këtij vendi, sa herë që përballë tyre gjenden subjekte të biznesit të madh
Pyetja që rilind në vend të ulërimës së revoltës edhe në këtë rast është, ku janë institucionet e pavarura të qeverisjes së gjyqësorit e të kontrollit të këtyre shpërdoruesve të pavarësisë së drejtësisë, të cilat prej kohësh po provojnë inekzistencën e tyre në raport me abuzime ulëritëse prokurorësh e gjykatësish të çdo niveli?
Njerëzit që na votojnë e kërkojnë llogarinë tek ne për qëndrimet Antiligj e Antishtet të njerëzve të drejtësisë së pavarësuar totalisht nga ekzekutivi. Po ne ku ta kërkojmë llogarinë në emër të interesave të tyre dhe të vetë shtetit, për këto e shumë thika të tjera pas shpinës që Republika jonë dhe plot qytetarë të saj marrin nga Gjelat e Ballinjtë brenda sistemit të drejtësisë, të cilët paguhen prej taksave të shqiptarëve më shumë e shumë më shumë se sa të gjithë rrogëtarët e tjerë të këtij shteti
Një gjë është pak po e sigurtë: Mandatin e fortë për ta bërë Shqipërinë 2030 shtet të së drejtës, anëtar të Bashkimit Europian, shqiptarët nuk e na e dhanë për të ngritur duart lart përballë Gjelave të prokurorive e Ballinjve të gjykatave, qoftë kur shqelmojnë Republikën qoftë kur grushtojnë njerëzit që meritojnë drejtësi, vetëm drejtësi dhe as më shumë e as më pak se sa drejtësi
Drejtësia vonon po nuk harron, thotë Populli. Për të gjithë