Alpinistët që duan të ngjiten në malin Everest do të duhet të dëshmojnë se kanë ngjitur më parë të paktën një majë mbi 7,000 metra brenda territorit të Nepalit, sipas një projektligji të ri që synon të frenojë mbipopullimin dhe të përmirësojë sigurinë në malin më të lartë të botës.
Ky ndryshim ligjor vjen si reagim ndaj kritikave të shumta ndaj politikave të deritanishme, që lejonin edhe alpinistë pa përvojë të përpiqeshin të arrinin majën prej 8,849 metrash të Everestit. Në sezonet e fundit, kjo ka shkaktuar bllokime të gjata në të ashtuquajturën “Zona e Vdekjes”, ku niveli i ulët i oksigjenit natyror përbën rrezik serioz për jetën.
Vetëm gjatë vitit 2023, 12 alpinistë humbën jetën dhe pesë të tjerë rezultojnë të zhdukur në Everest, ndërsa u dhanë 478 leje ngjitjeje. Vitin paraardhës, tetë alpinistë humbën jetën.
Përvoja e detyrueshme dhe kuadër lokal
Projektligji parashikon që për të marrë leje për Everestin, alpinisti duhet të ketë ngjitur më parë një majë mbi 7,000 metra brenda Nepalit. Po ashtu, udhëheqësi i ekipit (sardar) dhe guida malore që shoqërojnë alpinistët duhet të jenë shtetas nepalezë.
Projektligji është dorëzuar në Asamblenë Kombëtare, ku koalicioni qeverisës ka shumicën e nevojshme për miratimin e tij.
Kritikë nga operatorët ndërkombëtarë
Operatorët ndërkombëtarë të ekspeditave shprehen kritikë ndaj kësaj mase, duke kërkuar që përvoja mbi 7,000 metra të pranohet edhe nga male të tjerë jashtë Nepalit. Lukas Furtenbach nga kompania austriake Furtenbach Adventures tha se kufizimi vetëm në malet nepaleze nuk është praktik dhe propozoi që të përfshihen edhe maja të njohura për trajnim si Ama Dablam, Aconcagua apo Denali.
Sipas Furtenbach, është gjithashtu e rëndësishme që të lejohen guida malore të huaja me kualifikim ndërkombëtar si IFMGA, për shkak se në Nepal mungon një numër i mjaftueshëm i guidave të certifikuara.
Garrett Madison nga kompania amerikane Madison Mountaineering propozoi që një majë prej 6,500 metrash kudo në botë të ishte kriter më realist për përvojë.
Male me mbi 7,000 metra, por pa popullaritet
Sipas të dhënave të Ministrisë së Turizmit në Nepal, mbi 400 maja janë të hapura për ekspedita, nga të cilat 74 janë më të larta se 7,000 metra. Megjithatë, vetëm një numër i vogël prej tyre janë tërheqëse për alpinistët, sipas operatorëve vendas.
“Vetëm pak maja mbi 7,000 metra tërheqin ngjitës,” tha Tashi Lhakpa Sherpa nga kompania 14 Peaks Expedition, i cili ka ngjitur Everestin tetë herë.